सात वर्षानंतर आईवडिलांची झाली मुलाशी भेट
एएचटीयु आणि एलसीबी पथकाचा कौशल्यपूर्ण तपास
बीड दि.8 (प्रतिनिधी):
येथील अनैतिक मानवी प्रतिबंधक वाहतूक पथक आणि स्थानिक गुन्हा शाखेच्या पथकाने संयुक्तरीत्या कौशल्यपूर्ण केलेल्या तपासामुळे सात वर्षांपूर्वी हरवलेल्या मुलाचा शोध लागला असून आई-वडिलांचे आणि मुलाची भेट अखेर पोलीस यांच्या मदतीने बीड येथे झाली.
या संदर्भात माहिती अशी की, पिंपळेनर पोलिस ठाण्यात दाखल असलेल्या गुरन 143/2023 कलम 373 नुसार अल्पवयीन मुलगा राजु काकासाहेब माळी (सन 2017 चे वय 17) हा घरातून निघून गेला होता.
त्यावेळी राजु हा दहावीचे शिक्षण घेण्यासाठी बीड तालुक्यातील नाळवंडी येथील संगमेश्वर विद्यालयात शिकायला होता. त्याची राहण्याची सोय नसल्याने तो शिक्षक ज्ञानेश्वर राऊत यांच्या घरी राहत होता. आईवडीलांची परिस्थिती एकदम हलाकीची होती. ते ऊसतोडी कामगार असल्याने कर्नाटक राज्यात कामासाठी गेले होते. डिसेंबर 2017 मध्ये राजु हा शाळा सुटल्यावर कोणाला काही एक न सांगता निघून गेला. याबाबत त्याच्या आई वडिलांना माहिती मिळाली तेव्हा त्यांना कर्नाटक वरून येण्यास 8 दिवस लागले. आई वडिलांना वाटले की राजू काही दिवसात परत येईल. आईवडील दोघेही अशिक्षित असल्याने त्यांनी गुन्हा दाखल केला नाही. दरम्यान पाच ते सहा वर्ष निघून गेले. पण राजु परत आलाच नाही. सन 2023 मध्ये त्याच्या आईने पिंपळनेर ठाण्यात गुन्हा दाखल केला. सदर गुन्हा जानेवारी २०२५ मधे AHTU ला वर्ग झाला. पीएसआय पल्लवी जाधव यांनी एएचटीयु’ चा चार्ज घेतल्यावर सदर गुन्ह्याच्या तपास बारकाईने केला. तपासास राजूच्या आईवडिलांची भेट घेतली. त्यांचे अश्रु आणि दुःख खूप वेदनादायक होते. त्यानंतर राजूच्या शाळेत जावून त्याचे शिक्षकांची ही भेट घेतली व त्याच्या बाबत माहिती घेतली. मागील 5 वर्षे गुन्हा का दाखल झाला नाही? म्हणून शिक्षक ज्ञानेश्वर राऊत यांची भेट घेतली. सदर शिक्षकाच्या घरी राजू राहत होता. एखादा मुलगा आपल्या ताब्यातून निघून गेल्यावर त्याने गुन्हा दाखल का केला नाही? त्यांनीच काही बरेवाईट तर केले नसेल ना ? असा संशय पीएसआय पल्लवी जाधव यांना आला. पीएसआय जाधव यांनी पोलीस अधीक्षक नवनीत काँवत यांची भेट घेवून गुन्ह्याबाबत सर्व माहिती दिली. शिक्षकावर संशय असले बाबत ही सांगितले. पुढील तपासात LCB ची मदत घेण्याचे आदेश पोलीस अधीक्षकांनी दिले. स्थानिक गुन्हे शाखेचे पोलीस निरीक्षक शिवाजी बंटेवाड एलसीबी यांनी पीएसआय पल्लवी जाधव यांच्या मदतीसाठी पीएसआय श्रीराम खटावकर यांना आदेश दिला. त्यानंतर दोघांनी मिळून तपास सुरू केला. सदर शिक्षकाकडून काही एक माहिती मिळाली नाही. त्यानंतर पीएसआय खटावकर यांनी मदतीने राजू ची माहिती काढली. सदर माहितीवरून राजूचे लोकेशन पुणे येथे असल्याचे समजले. तिथे जाऊन त्यांनी कौशल्यपूर्ण तपास केला. खटावकर यांनी राजू ला पुढील तपासकामी पीएसआय पल्लवी जाधव यांच्या ताब्यात दिले. त्यानंतर त्यास पोलीस अधीक्षक नवनीत काँवत यांच्या समोर हजर केले. त्यावेळी तेथे राजूचे आई,ववडील ही हजर होते. त्यांच्यासाठी ही विशेष भेट सरांनी घडवून आणली.
सदर कार्यवाही पोलीस अधीक्षक नवनीत काँवत, अप्पर पोलीस अधीक्षक सचिन पांडकर, पोनि शिवाजी बंटेवाड यांच्या मार्गदर्शनाखाली पोलीस उप निरीक्षक पल्लवी जाधव , पोलीस उप निरीक्षक श्रीराम खटावकर , पोलीस हवालदार असिफ शेख, आनंद म्हस्के, हेमा वाघमारे , उषा चौरे, प्रदीप येवले, अशोक शिंदे, पोना अर्जुन यादव, पोलीस शिपाई प्रदीप वीर, योगेश आदींनी संयुक्तरित्या केली.