मुंबई: भाजप आणि राष्ट्रीय स्वयंसेवक संघ या दोन्ही पुरोगामी संघटना आहेत. स्त्रियांचा आदर ठेवणे, ही संघाची प्राथमिकता आहे. मी संघ आणि भाजप दोन्ही संघटनाच्या जवळ आहे. पण मी अराजकीय आहे. परंतु, देशात स्त्रियांचा सर्वाधिक आदर कुठे होत असले तो राष्ट्रीय स्वयंसेवक संघात होतो, हे मी खात्रीने सांगू शकते, असे वक्तव्य अमृता फडणवीस (Amruta Fadnavis) यांनी केले. कीर्तनकार बंडातात्या कराडकर यांनी महिलांविषयी नुकतेच वादग्रस्त वक्तव्य केले होते. त्यासाठी बंडातात्या कराडकर यांना अटकही करण्यात आली आहे. मात्र, बंडातात्या कराडकर यांना बोलविता धनी राष्ट्रीय स्वयंसेवक संघ आणि भाजप आहे, अशी चर्च सुरु आहे. याविषयी अमृता फडणवीस यांना विचारले असता त्यांनी RSS ही स्त्रियांचा आदर करणारी संघटना असल्याचे म्हटले. त्या शुक्रवारी मुंबईत प्रसारमाध्यमांशी बोलत होत्या.
यावेळी अमृता फडणवीस यांना बंडातात्या कराडकर यांनी महिला नेत्यांविषयी विधानाविषयी प्रतिक्रिया विचारण्यात आली. त्यावर अमृता फडणवीस यांनी म्हटले की, मला वाटतं आपल्या देशात स्त्रियांनी आधीच खूप भोगलं आहे. त्यामुळे स्त्रियांच्या वैयक्तिक आयुष्याविषयी टिप्पणी करणे चूक आहे. आपल्या देशात स्त्रियांविषयी काही बोललं गेलं किंवा त्यांच्यावर अत्याचार झाल्यावरच आंदोलने होतात. पण हा प्रश्न मानसिकतेचा आहे. आपल्याला स्त्रियांबाबत बोलताना विचार करुन बोलायला पाहिजे. स्त्रियांवर वैयक्तिक टिप्पणी होता कामा नये, असे मत अमृता फडणवीस यांनी व्यक्त केले.
हे सुद्धा वाचा:-
त्यांना नामर्द ही उपाधी लोकांनी दिलेय: अमृता फडणवीस
अमृता फडणवीस यांनी काही दिवसांपूर्वी एक ट्विट करुन शिवसेना खासदार संजय राऊत यांच्यावर टीका केली होती. यामध्ये अमृता यांनी संजय राऊत यांचा उल्लेख नॉटी नामर्द असा केला होता. याविषयी अमृता फडणवीस यांना विचारण्यात आले. त्यावर अमृता यांनी म्हटले की, त्यांनी लोकांनीच ही उपाधी दिली आहे. मध्यंतरी त्यांनी एक चुकीची पोस्ट टाकली तेव्हा एका महिला नेत्यानेही त्यांचा तसाच उल्लेख केला. पण नामर्द या शब्दाचा तंतोतंत अर्थ घेऊ नये. याचा अर्थ म्हणजे कोणतीही गोष्ट थेटपणे समोरुन न करता ते मागून करतात, असे अमृता फडणवीस यांनी म्हटले.