परळी : मागील सात-आठ वर्षापासून विवाहीतेचा छळ करून अखेर तिला पेटवून दिले. ही घटना शुक्रवारी (११ जून) पहाटे परळीतील थर्मल कॉलनीत घडली. याप्रकरणी तिची सासू, जाऊ, पती आणि दिरावर गुन्हा दाखल करण्यात आला.
मनीषा रुपेश चव्हाण (वय ३०, रा. थर्मल कॉलनी, परळी) असे त्या विवाहितेचे नाव आहे. मनीषाच्या फिर्यादीनुसार, मागील सात ते आठ वर्षापासून तिचा सासरी सतत छळ सुरु होता. सासू विमल किसन चव्हाण, जाऊ आशा दीपक चव्हाण, पती रुपेश किसन चव्हाण आणि दिर दीपक किसन चव्हाण हे चौघे सतत तिला नेहमी मानसिक आणि शारीरिक त्रास देऊन मारहाण करत. अखेर शुक्रवारी पहाटे ३.३० वाजताच्या सुमारास त्या चौघांनी जीवे मारण्याच्या उद्देशाने मनीषाला पेटवून दिले. या घटनेत मनीषा गंभीररित्या भाजली. तिच्यावर सध्या नांदेड येथील रुग्णालयात उपचार सुरु आहेत. याप्रकरणी चारही आरोपींवर कलम ३०७, ४९८(अ) अन्वये परळीच्या संभाजीनगर ठाण्यात गुन्हा दाखल करण्यात आला. उपविभागीय पोलीस अधिकारी सुनील जायभाये यांनी घटनास्थळी भेट देऊन पाहणी केली. पोलिसांनी मनीषाची सासू विमलला ताब्यात घेतले असून इतर आरोपी फरार आहेत. पुढील तपास पोलीस उपनिरिक्षक सी.एच. मेढके करत आहेत.