वॉशिंग्टन: दहशतवाद्यांचे आश्रयस्थान असणारा पाकिस्तान हा अमेरिकेच्यालेखी भारतापेक्षा काही प्रमाणात अधिक सुरक्षित आहे. अमेरिकन नागरिकांसाठी जारी करण्यात आलेल्या प्रवास निर्देश यादीत अमेरिकेने पाकिस्तानच्या श्रेणीत सुधारणा केली आहे. याआधी भारत, पाकिस्तान, सीरिया, इराक आदी देशांना अमेरिकेने चार इतके रेटिंग दिले होते. त्यातून आता पाकिस्तानला वगळण्यात आले असून तीन रेटिंग देण्यात आले आहे.
US travel advisory : पाकिस्तान हा भारतापेक्षा अधिक सुरक्षित असल्याचे अमेरिकेच्या परराष्ट्र खात्याने म्हटले आहे. अमेरिकन नागरिकांना प्रवास करण्यासाठी जारी केलेल्या नव्या निर्देशात अमेरिकेने पाकिस्तानची रेटिंग वाढवली आहे.
अमेरिकेच्या परराष्ट्र मंत्रालयाने पाकिस्तानच्या श्रेणीत सुधारणा केली असली तरी दहशतवादी घटना आणि अपहरणाच्या घटनांमुळे बलुचिस्तान, खैबर पख्तुनख्वा आणि प्रत्यक्ष नियंत्रण रेषेजवळ न जाण्याचा सल्ला अमेरिकेने आपल्या नागरिकांना दिला आहे. करोनाबाधितांच्या संख्येत घट आढळून आली आहे. त्याशिवाय २०१४ नंतर पाकिस्तानमध्ये देशांतर्गत सुरक्षितेच्यादृष्टीने मोठी पावले उचलण्यात आली आहेत. पाकिस्तानच्या सुरक्षा दलाने दहशतवाद आणि कट्टरवादाविरोधात मोठी मोहीम सुरू केली होती असेही अधिकाऱ्यांनी म्हटले.
अमेरिकेच्या परराष्ट्र मंत्रालयानुसार, भारतात प्रवास करणे अमेरिकन नागरिकांनी टाळायला हवे. भारतात करोनाचे संकट आहे. त्याशिवाय देशात गु्न्हेगारीच्या घटना आणि दहशतवादी घटनांमध्ये वाढ झाली आहे. त्यामुळे अमेरिकन नागरिकांनी भारतात प्रवास करू नये अशी सूचना देण्यात आली होती. मंगळवारी जारी करण्यात आलेल्या निर्देशांमध्ये भारताबाबत याच सूचना कायम ठेवण्यात आल्या आहेत. तर, पाकिस्तानमधील प्रवासाबाबत पुनर्विचार करण्यात यावा अशी सूचना अमेरिकेने आपल्या नागरिकांना दिली आहे. याआधी १० ऑगस्ट रोजी जाहीर केलेल्या यादीत भारत आणि पाकिस्तान एकाच श्रेणीत होते.
ट्रम्प प्रशासनाने भारताच्या रेटिंगमध्ये कोणतीही सुधारणा केली नाही. भारता प्रवास न करण्याची सुचना अमेरिकेने आपल्या नागरिकांनी केली आहे. करोनाचे वाढते संकट, गुन्हेगारी आणि दहशतवादामुळे भारतात प्रवास न करण्याचा अमेरिकेने आपल्या नागरिकांना म्हटले. अमेरिकेने भारताला सीरिया, इराक, येमेन या देशांच्या श्रेणीत स्थान दिले आहे.
भारतात करोनाबाधितांच्या वाढत्या संख्येमुळे चार रेटिंग कायम ठेवण्यात आली असल्याचे म्हटले जाते. ही रेटिंग अतिशय वाइट असल्याचे म्हटले जाते. याआधीदेखील भारताचा समावेश या श्रेणीत केल्यानंतर इंडियन टूरिझम अॅण्ड हॉस्पिटलटी संघाने (FAITH) केंद्र सरकारकडे ही ट्रॅव्हल अॅडव्हायझरी बदलण्यासाठी अमेरिकेवर दबाव टाकावा अशी विनंती केली होती. भारत सरकारने या विषयाला प्राथमिकता देऊन या सूचनांमध्ये बदल करण्यास सांगितले पाहिजे. यामुळे भारताबद्दल नकारात्मक प्रतिमा तयार होत आहे. करोनाच्या महासाथीमुळे आधीच पर्यटन व्यवसायाला मोठा फटका बसला आहे. भारतात पुन्हा एकदा पर्यटन व्यवसाय सुरू होण्याच्या मार्गावर आहे. अशातच अमेरिकेने नागरिकांना दिलेल्या अॅडव्हायझरीमुळे पर्यटन व्यवसायाला आणखी फटका बसणार असल्याची भीती FAITH ने व्यक्त केली होती.