नवी दिल्ली: इ-कॉमर्समधील आघाडीची कंपनी अमेझॉनने नुकताच प्राइम डे सेल सुरू केला होता. या सेलमुळे कंपनीचा जबरदस्त फायदा झाला. सेलमध्ये जवळपास ४ हजार छोटे विक्रेते सहभागी झाले होते. ज्यांची विक्री १० लाखापेक्षा अधिक जाली. तर २०९ असे विक्रेते होते जे करोडपती झाले.
गेल्या आठवड्यात अमेझॉनने ६ ते ७ ऑगस्ट या दोन दिवसात प्राइम डे सेल आयोजित केला होता. या सेलमध्ये ग्राहकांना अनेक गोष्टी जशा सवलतीत मिळाल्या तसाच फायदा विक्रेत्यांना देखील झाला. या सेलची चर्चा होण्याचे सर्वात महत्त्वाचे कारण म्हणजे करोना व्हायरसमुळे लोक गेल्या काही महिन्यांपासून घराबाहेर पडू शकले नाहीत. लॉकडाउनमुळे बाजार बंद असल्याने लोकांना अनेक वस्तू विकत घेता आल्या नाहीत. अशात प्राइम सेलमुळे लोकांनी सोशल डिस्टसिंगचे नियम पाळत ऑनलाइन खरेदी केली.
प्राइम डे सेलच्या दोन दिवसात ५ हजार ९०० पेक्षा अधिक पिन कोडवरील ९१ हजार हून अधिक एसएमबी, कलाकार, महिला उद्योजग यांचा फायदा झाला. यात ६२ हजारहून अधिक विक्रेते गैर मेट्रो आणि २ आणि ३ टिअर शहरातील होते. ३१ हजार एसएमबी विक्रेत्यांनी त्यांची आतापर्यंतची सर्वात चांगली विक्री केली. ४ हजारहून अधिक विकेत्यांची १० लाखापेक्षा अधिक विक्री तर २०९ विक्रेते फक्त ४८ तासात करोडपती झाले.
या दोन दिवसात इतकी विक्री झाली की त्याने दिवाळीच्या दिवसात डेली सेल मध्ये होणाऱ्या विक्रीला मागे टाकले. सूत्रांनी दिलेल्या माहितीनुसार ४८ तासात अमेझॉनलाने जवळपास ६०० मिलियन डॉलर अर्थात ४ हजार ५०० कोटी रुपयांच्या वस्तू विकल्या. आधीच्या अंदाजानुसार ही विक्री ४०० ते ५०० मिलियन डॉलरच्या दरम्यान असेल असे वाटले होते. पण करोना लॉकडाउनमुळे लोकांनी ऑनलाइन खरेदीकडे मोर्चा वळवला. यामुळे अमेझॉनच्या सेलला बुस्ट मिळाला.
या वर्षाच्या प्राइम डे सेलला भारतातील ९७ टक्के पिन कोडवरून खरेदीसाठी ऑर्डर करण्यात आली. गेल्या प्राइम डे सेलच्या तुलनेत यावर्षी २०२० मध्ये दुप्पट ग्राहकांनी लॉगइन केले. ६५ टक्के नवे ग्राहक देशातील टॉप १० शहराच्या बाहेरचे होते. यात हिमाचल प्रदेशमधील कुल्लू, लडाख मधील लेह, राजस्थानमधील धोलपूर आणि सिरोही, ओडिशातील कोरापुट, नागालँडमधील मोकोकचूंग, मेघालयमधील गारो हिल्स, कर्नाटकमधील गडक, तामिळनाडूतील नागापटीनम आणि मध्य प्रदेशमधील पन्ना आदींचा समावेश होता.
या सेलमुळे विकेत्यांची विक्री दैनिक विक्रीच्या तुलनेत ६.७ टक्क्यांनी वाढली. तर महिला उद्योग संस्थांच्या विक्री २.६ टक्के इतकी वाढली. यामुळे अनेक छोट्या विक्रेत्यांना मोठा फायदा झाला आहे. गेल्या ३ ते ४ महिन्यापासून झालेला तोटा भरून काढण्यात मदत मिळाली आहे.