बीड (केज): प्रशासकीय दिरंगाई आणि महसूल अधिकाऱ्यांच्या जाचक भूमिकेला कंटाळून केज तहसील कार्यालयाच्या परिसरात एकाच कुटुंबातील चौघांनी अंगावर डिझेल ओतून आत्मदहन करण्याचा प्रयत्न केला. जमिनीच्या मोजणीत महसूल अधिकाऱ्यांनी खोडा घातल्याचा आरोप करत संतप्त लांडगे कुटुंबाने हे टोकाचे पाऊल उचलले. सुदैवाने, पोलिसांनी वेळीच हस्तक्षेप केल्याने मोठा अनर्थ टळला.
नेमकी घटना काय?
मिळालेल्या माहितीनुसार, केज-बीड राष्ट्रीय महामार्गालगत असलेल्या गायरान जमिनीतील वडिलोपार्जित क्षेत्रावर लांडगे कुटुंबाची वहिवाट आहे. मात्र, या जमिनीचा ताबा मिळवण्यात त्यांना कायदेशीर अडचणी येत होत्या. केज न्यायालयाने या जमिनीची मोजणी करून सीमांकन करण्याचे आदेश दिले होते. या आदेशानुसार तहसीलदारांनी १२ जानेवारी २०२६ रोजी भूमि अभिलेख कार्यालयाचे मोजणी कर्मचारी, मंडळ अधिकारी आणि ग्राम महसूल अधिकाऱ्यांना प्रत्यक्ष जागेवर हजर राहून मोजणी करण्याचे निर्देश दिले होते.
अधिकाऱ्यांच्या असहकार्यामुळे संताप
मोजणी कर्मचारी घटनास्थळी पोहोचले, मात्र मंडळ अधिकाऱ्यांनी मोजणी प्रक्रियेत सहकार्य केले नाही आणि अहवाल सादर करण्यास टाळाटाळ केली. यामुळे अनेक दिवसांपासून न्यायाच्या प्रतीक्षेत असलेल्या लांडगे कुटुंबाचा संयम सुटला. महसूल विभागाच्या या “तारीख पे तारीख” धोरणामुळे हताश होऊन कुटुंबातील चार सदस्यांनी थेट तहसील कार्यालयाचे दार गाठले आणि अंगावर डिझेल ओतून स्वतःला संपवण्याचा प्रयत्न केला.
पोलीस प्रशासनाची तत्परता
या घटनेमुळे तहसील कार्यालय परिसरात एकच खळबळ उडाली. कर्तव्यावर असलेल्या पोलीस कर्मचाऱ्यांनी प्रसंगावधान राखत तातडीने कुटुंबाला ताब्यात घेतले. पोलिसांनी वेळीच डिझेलच्या बाटल्या हस्तगत केल्यामुळे कोणतीही जीवितहानी झाली नाही.