मंत्री पंकजा मुंडे यांचे स्वीय सहायक (PA) अनंत गर्जे यांची पत्नी डॉ. गौरी पालवे-गर्जे यांच्या आत्महत्येमुळे संपूर्ण महाराष्ट्रात खळबळ उडाली आहे. डॉ. गौरी गर्जे यांनी राहत्या घरी आपले जीवन संपवले. या प्रकरणी पोलिसांनी गौरीचे पती अनंत गर्जे यांना अटक केली आहे. बीड पोलिसांनी २४ नोव्हेंबरच्या रात्री १ वाजता त्यांना बेड्या ठोकल्या असून, २ डिसेंबरपर्यंत त्यांना पोलीस कोठडी सुनावण्यात आली आहे.
दरम्यान, गौरी गर्जे यांचा पोस्टमॉर्टम रिपोर्ट समोर आला असून, त्यातून अत्यंत महत्त्वाचे खुलासे झाले आहेत. या अहवालानुसार, गौरीच्या शरीरावर अनेक जखमा आढळल्या आहेत. इतकंच नव्हे तर, धक्कादायक बाब म्हणजे आरोपी अनंत गर्जे यांच्या अंगावरही जखमा असल्याची माहिती पोलिसांनी दिली आहे. यामुळे गौरी आणि आरोपीमध्ये झटापट झाली होती का, या दिशेने पोलीस तपास करत आहेत.
या प्रकरणाला कलाटणी देणारी आणखी एक बाब म्हणजे, दोघांमधील संभाषणाचे कॉल रेकॉर्ड्स पोलिसांना मिळाले असून, ते संशयास्पद वाटत असल्याचा दावा पोलिसांनी केला आहे. या सर्व गोष्टींमुळे प्रकरणाला वेगळे वळण मिळण्याची शक्यता असून, सखोल तपासासाठी पोलिसांनी गर्जे यांची पोलीस कोठडी २ डिसेंबरपर्यंत वाढवून घेतली आहे. पोस्टमॉर्टमच्या प्राथमिक अहवालात गौरीच्या गळ्यावर दाब पडल्याचेही उघड झाले आहे.
या गंभीर आत्महत्येप्रकरणी पती अनंत गर्जे, नणंद शीतल गर्जे आणि दीर अजय गर्जे यांच्याविरोधातही गुन्हा दाखल करण्यात आला आहे. गौरीला मारहाण करून मानसिक त्रास देत आत्महत्येस प्रवृत्त केल्याचा आरोप त्यांच्यावर आहे.
गौरीचे वडील डॉ. अशोक पालवे यांनी दिलेल्या जबाबानुसार, अनंत गर्जेच्या पहिल्या पत्नीचे गर्भधारणा झाल्याचे कागदपत्र गौरीला मिळाले होते, ज्यामुळे ती अस्वस्थ होती आणि ही कागदपत्रे तिने वडिलांनाही पाठवली होती. वरळी पोलीस ठाण्यात तिघांवर भा.दं.वि. (BNS) कलम १०८, ८५, ३५२, ३५१(२) अंतर्गत गुन्हा दाखल आहे.
या संवेदनशील घटनेनंतर विधान परिषदेच्या उपसभापती नीलम गोऱ्हे यांनी बीडच्या शिरूर तालुक्यातील पिंपळनेर येथे जाऊन पालवे कुटुंबीयांची भेट घेतली. त्यांनी डॉ. अशोक पालवे आणि त्यांच्या कुटुंबीयांशी संवाद साधून घटनेची माहिती घेतली. तसेच, तपासात आणखी कोणती मदत अपेक्षित आहे, याबद्दल विचारणा केली. पालवे कुटुंबाने या प्रकरणातील इतर दोन आरोपी शीतल आणि अजय यांनाही तात्काळ अटक करण्याची मागणी केली आहे. गोऱ्हे यांनी या प्रकरणाच्या सुनावणीसाठी विशेष सरकारी वकील नियुक्त करण्याबाबतही सूचना केल्या आहेत.