बीड / मुंबई: राज्याच्या मंत्री पंकजा मुंडे यांचे स्वीय सहायक (PA) अनंत गर्जे यांच्या पत्नी डॉ. गौरी पालवे-गर्जे यांच्या मृत्यूने राजकीय वर्तुळात मोठी खळबळ उडाली आहे. २३ नोव्हेंबर रोजी मुंबईतील त्यांच्या निवासस्थानी गौरीचा मृतदेह आढळला होता. पोलिसांनी हे प्रकरण आत्महत्या म्हणून नोंदवले असले तरी, गौरीच्या कुटुंबियांनी, विशेषतः वडिलांनी, यावर अत्यंत गंभीर आक्षेप घेतला आहे. ही आत्महत्या नसून, गौरीची हत्या करण्यात आली आणि नंतर ती आत्महत्या भासविण्यात आली, असा खळबळजनक आरोप त्यांनी केला आहे. “जे काही करायचं ते करा, पण आम्हाला न्याय द्या,” अशी आर्त मागणी गौरीच्या कुटुंबियांनी केली आहे.
‘गुन्हेगारांची नार्को टेस्ट करा’: वडिलांचा थेट आव्हान
गौरीच्या वडिलांनी तपासाच्या पद्धतीवर थेट प्रश्नचिन्ह उभे केले आहे. “या प्रकरणाची चौकशी न करता ती आत्महत्या कशी काय ठरवली?” असा सवाल करत त्यांनी तपास यंत्रणांना आव्हान दिले आहे. “या प्रकरणात गुन्हेगारांची नार्को टेस्ट, ब्रेन मॅपिंग जे काही करायचं असेल ते करा. माझ्या मुलीची हत्या करण्यात आली आहे,” असा त्यांचा ठाम दावा आहे. मुख्य आरोपी अनंत गर्जे याच्यासह त्याचा भाऊ अजय गर्जे आणि बहीण शीतल आंधळे यांची कसून चौकशी व्हावी, अशी मागणी त्यांनी केली आहे. गौरीच्या डोक्यावर आणि छातीवर मारहाणीच्या खुणा असल्याचा दावाही त्यांनी केला. गौरीला मारहाण झाली आणि त्यात तिचा जीव गेला, त्यानंतर तिला रुग्णालयात नेण्यात आले, असे ते म्हणाले. “अनंत गर्जे वारंवार त्याचे स्टेटमेंट बदलत आहे, त्यामुळे त्याची सखोल चौकशी व्हावी,” अशी मागणी त्यांनी लावून धरली आहे.
दीर आणि नणंदेला अटक करा; सीसीटीव्ही फुटेजची मागणी
गौरीच्या वडिलांनी वरळी पोलिसांना लेखी पत्र देत आपल्या मागण्या स्पष्ट केल्या आहेत. गौरीच्या हत्येमध्ये दीर अजय गर्जे आणि नणंद शीतल आंधळे यांचा हात असल्याचा त्यांचा आरोप आहे, परंतु अनंत गर्जे वगळता हे दोघेही ‘मोकाट’ फिरत असल्याचा उल्लेख त्यांनी पत्रात केला आहे. गौरीला ‘दोन सहकाऱ्यांच्या मदतीने’ मारण्यात आले आहे, असे त्यांचे म्हणणे आहे. या महत्त्वाच्या आरोपींना तातडीने अटक करावी आणि त्यांचा सीडीआर (CDR) अर्थात कॉल डिटेल्स रेकॉर्ड तपासणीसाठी उपलब्ध करून द्यावा, अशी त्यांची मागणी आहे. याशिवाय, ज्या टॉवर बिल्डींगमध्ये गौरी आणि अनंत राहत होते, त्या संपूर्ण बिल्डींगचे सीसीटीव्ही फुटेज कुटुंबियांना मिळावे, यासाठी त्यांनी पोलिसांकडे आग्रह धरला आहे.