मुंबई: केईएम रुग्णालयाच्या डॉक्टर गौरी पालवे-गर्जे यांच्या आत्महत्या प्रकरणी महाराष्ट्र राज्य महिला आयोगाच्या अध्यक्षा सौ. रुपालीताई चाकणकर यांनी आज गौरीच्या कुटुंबीयांची भेट घेऊन त्यांचे सांत्वन केले. या भेटीदरम्यान त्यांनी संपूर्ण घटनेची सविस्तर माहिती घेतली. हे प्रकरण अत्यंत संवेदनशील असून, गौरीला न्याय मिळवून देण्यासाठी आयोग सक्रियपणे लक्ष देईल, असे आश्वासन चाकणकर यांनी यावेळी पीडित कुटुंबियांना दिले.
या गंभीर प्रकरणाचा तपास निष्पक्षपणे होईल, यासाठी अध्यक्षांनी पोलिसांना महत्त्वाच्या सूचना दिल्या आहेत. पोलिसांकडून या घटनेचा सखोल तपास व्हावा आणि कुठल्याही दबावाखाली न येता कायद्यानुसार कारवाई करावी, यासाठी चाकणकर यांनी पोलिस अधिकाऱ्यांशी चर्चा केली. हाय-प्रोफाईल व्यक्तीशी संबंधित हे प्रकरण असल्यामुळे तपासात कोणतीही दिरंगाई किंवा त्रुटी राहू नये, यासाठी राज्य महिला आयोग स्वतः लक्ष ठेवून आहे, असे त्यांनी स्पष्ट केले. कुटुंबीयांनी व्यक्त केलेल्या प्रत्येक शंकेचा आणि मागणीचा पोलिसांनी गांभीर्याने विचार करावा, असे निर्देशही त्यांनी दिले.