बीड दि.२४ (प्रतिनिधी)- बीड पोलिसांना गेली सहा वर्षे सातत्याने गुंगारा देत, कायद्याला आव्हान देणाऱ्या एका कुख्यात आरोपीच्या अखेर मुसक्या आवळण्यात आल्या आहेत! उपविभागीय पोलीस अधिकारी (DYSP) पूजा पवार यांच्या धडक पथकाने ही महत्त्वपूर्ण कारवाई केली आहे.कविराज उर्फ बंटी राजकुमार जाधव (रा. घोडक राज़री) असे या आरोपीचे नाव आहे, ज्याच्याविरुद्ध पिंपळनेर पोलीस ठाण्यात अनेक गंभीर स्वरूपाचे गुन्हे दाखल आहेत.
मागील सहा वर्षांपासून पोलिसांना चकमा देणाऱ्या या आरोपीला बीड शहरातील एका हॉटेलमध्ये लपून बसल्याची गुप्त माहिती डीवायएसपी पूजा पवार यांना मिळाली.या माहितीच्या आधारे, डीवायएसपी पूजा पवार यांच्या नेतृत्वाखालील पथकाने कोणतीही दिरंगाई न करता, पहाटेच्या सुमारास (३ वा.) छापा मारून त्याला ताब्यात घेतले. सहा वर्षांपासून फरार असलेल्या या आरोपीला त्वरित पिंपळनेर पोलिसांच्या स्वाधीन करण्यात आले आहे.
पोलीस अधिक्षक नवनीत कॉवत, अप्पर पोलीस अधिक्षक सचिन पांडकर आणि पोलीस उपाधीक्षक पूजा पवार यांच्या कठोर मार्गदर्शनाखाली पीएसआय काटकर, सचिन आगलावे आणि श्री. राऊत यांनी ही धाडसी आणि प्रशंसनीय कामगिरी यशस्वी केली आहे.