बीड: तब्बल नऊ वर्षांच्या प्रतीक्षेनंतर राज्यातील २४६ नगरपालिका निवडणुकांच्या तारखा जाहीर झाल्यामुळे स्थानिक स्वराज्य संस्थांच्या राजकारणाचा बिगुल वाजला आहे. या निवडणुकीच्या निमित्ताने राज्यात महाविकास आघाडी आणि महायुती एकत्र असल्या तरी स्थानिक पातळीवर मात्र वेगळीच समीकरणे पाहायला मिळत आहेत. बीडमध्येही (Beed) अशाच राजकीय भूकंपाची चिन्हे दिसत आहेत. कारण, राष्ट्रवादी काँग्रेस शरदचंद्र पवार पक्षाचे विद्यमान आमदार संदीप क्षीरसागर यांचे सख्खे बंधू हेमंत क्षीरसागर यांनी भारतीय जनता पक्षात (BJP) प्रवेश करण्याचा महत्त्वपूर्ण निर्णय घेतला आहे.
हा प्रवेश म्हणजे राष्ट्रवादी काँग्रेस शरदचंद्र पवार पक्षासाठी आणि खुद्द आमदार संदीप क्षीरसागर यांच्यासाठी मोठा धक्का मानला जात आहे.
विकासाच्या दृष्टिकोनातून भाजपमध्ये प्रवेश
स्थानिक स्वराज्य संस्थांच्या निवडणुकीच्या तोंडावर हेमंत क्षीरसागर यांनी भाजपमध्ये जाण्याच्या निर्णयावर स्पष्टता दिली आहे. आजपर्यंतच्या प्रत्येक निवडणुकीत आमदार संदीप क्षीरसागर यांच्यासोबत राहिलेल्या हेमंत क्षीरसागर यांनी आता ‘विकासाचा दृष्टिकोन’ ठेवून भाजपमध्ये प्रवेश निश्चित केल्याचे सांगितले आहे.
बीडमध्ये महाविकास आघाडी आणि महायुतीमध्ये फूट पडल्याचे चित्र दिसत असताना, क्षीरसागर बंधूंमधील हा राजकीय संघर्ष आगामी निवडणुकीत महत्त्वाचा ठरणार आहे.
सख्ख्या भावाकडूनच राजकीय आव्हान
बीड विधानसभा मतदारसंघात राजकीय जीवनात कायमच मोठे बंधू आमदार संदीप क्षीरसागर यांना साथ देणारे हेमंत क्षीरसागर, आता त्यांचे पक्के राजकीय विरोधक म्हणून मैदानात उतरणार आहेत. आगामी स्थानिक स्वराज्य संस्थांच्या निवडणुकीत सख्ख्या भावाकडूनच संदीप क्षीरसागर यांच्यासमोर मोठे राजकीय आव्हान उभे राहणार आहे.
हेमंत क्षीरसागर यांची राजकीय पार्श्वभूमी:
* ते विद्यमान आमदार संदीप क्षीरसागर यांचे धाकटे बंधू आहेत.
* त्यांनी यापूर्वी बीड नगर परिषदेचे उपनगराध्यक्ष म्हणून कार्यभार पाहिला आहे.
* बीड नगर परिषदेच्या राजकारणात त्यांचा सक्रिय सहभाग राहिला आहे.
आता स्थानिक स्वराज्य संस्थांच्या निवडणुकांदरम्यान हेमंत क्षीरसागर यांचा भाजप प्रवेश निश्चित मानला जात असून, भाजप त्यांना कोणती ऑफर देते आणि त्यांचा प्रवेश नेमका कधी होतो, याकडे संपूर्ण बीड जिल्ह्याचे लक्ष लागले आहे.