परळी: आगामी परळी नगरपरिषद निवडणुकीच्या पार्श्वभूमीवर राजकीय घडामोडींना वेग आला आहे. माजी नगराध्यक्ष दीपक देशमुख यांनी परळी नगरपरिषदेत विकासकामांमध्ये भ्रष्टाचार झाल्याचा गंभीर आरोप करत आज राष्ट्रवादी काँग्रेस शरदचंद्र पवार पक्षात (NCP Sharad Pawar Faction) प्रवेश केला आहे. विशेष म्हणजे, परळीतील नगराध्यक्षपदाची जागा सर्वसाधारण महिला उमेदवारासाठी आरक्षित असल्याने, त्यांच्या पत्नी संध्या देशमुख या निवडणुकीच्या रिंगणात उतरणार आहेत.
देशमुख यांच्या या प्रवेशाकडे आमदार धनंजय मुंडे यांना मोठा धक्का मानला जात आहे. प्रवेशाच्या वेळी बोलताना देशमुख यांनी आमदार धनंजय मुंडे यांच्यावरही गंभीर आरोप केले.
‘मी पक्षनिष्ठ नाही, व्यक्तीनिष्ठ माणूस’: दीपक देशमुख
राष्ट्रवादी काँग्रेस शरदचंद्र पवार पक्षात प्रवेश करताना माजी नगराध्यक्ष दीपक देशमुख यांनी आपली भूमिका स्पष्ट केली. ते म्हणाले, “मी व्यक्तीनिष्ठ माणूस आहे, पक्षनिष्ठ नाही. येथील आमदार आणि सत्ताधाऱ्यांचे काम पाहिले, कोणतेही विकास कामे झाली नाहीत. आम्ही वारंवार ही बाब वरिष्ठांच्या कानावर घातल्यावरही यावर कुठला मार्ग निघाला नाही.”
परळीतील नगराध्यक्षपदाची जागा सर्वसाधारण महिला प्रवर्गासाठी सुटल्यामुळे त्यांनी आपल्या पत्नी संध्या देशमुख यांना उमेदवार म्हणून निवडणुकीच्या प्रचाराला सुरुवात केल्याचेही यावेळी जाहीर केले.
दीपक देशमुख यांच्या या प्रवेशावेळी खासदार बजरंग सोनवणे, आमदार जितेंद्र आव्हाड, आणि पक्षाचे नवनिर्वाचित प्रदेश सरचिटणीस राजाभाऊ फड उपस्थित होते.