आज लाडकी बहीण पेक्षा सुरक्षित बहीण योजनेची जास्ती गरज आहे

फलटण उपजिल्हा रुग्णालयात कार्यरत असलेल्या एका महिला डॉक्टरने गुरुवारी रात्री आत्महत्या केल्याची धक्कादायक घटना घडल्याने संपूर्ण राज्यात खळबळ उडाली आहे. या महिला डॉक्टरने आत्महत्येपूर्वी आपल्या हातावर लिहिलेल्या मजकुरात पोलीस उपनिरीक्षक (PSI) गोपाळ बदने (Gopal Badne) याने चार वेळा बलात्कार केल्याचा गंभीर आरोप केला आहे.
या घटनेमुळे संताप व्यक्त होत असून, संबंधित अधिकाऱ्यावर कठोर कारवाई करण्याची मागणी होत आहे. याच पार्श्वभूमीवर शिवसेना (ठाकरे गट) नेते आणि विधान परिषदेचे माजी विरोधी पक्षनेते अंबादास दानवे (Ambadas Danve) यांनी या प्रकरणावरून मुख्यमंत्री देवेंद्र फडणवीस (Devendra Fadnavis) यांच्यावर निशाणा साधला आहे.

अंबादास दानवे यांनी ‘एक्स’वर पोस्ट करत म्हटले आहे की, मुख्यमंत्री देवेंद्र फडणवीस हे घ्या फलटणमध्ये आपले कर्तव्य करताना गृहखात्याच्या पाईकांकडून छळ झालेल्या महिलेचा तक्रार अर्ज आणि त्यावर झालेल्या कारवाईची माहिती मागणारा माहिती अधिकाराचा दोन महिन्यांनी केलेला अर्ज. याची उत्तरे द्यावी लागतील आपल्याला देवाभाऊ!

मुख्यमंत्री
@Dev_Fadnavis
हे घ्या फलटणमध्ये आपले कर्तव्य करताना गृखात्याच्या पाईकांकडून छळ झालेल्या महिलेचा तक्रार अर्ज आणि त्यावर झालेल्या कारवाईची माहिती मागणारा माहिती अधिकाराचा दोन महिन्यांनी केलेला अर्ज. याची उत्तरे द्यावी लागतील आपल्याला देवाभाऊ!

१. एका कर्तव्यदक्ष डॉक्टरच्या तक्रार अर्जावर महिने महिने कारवाई न करणाऱ्या अधिकाऱ्यांवर तुम्ही काय कारवाई करणार?

२. ही आत्महत्या नाही तर मुजोर अधिकाऱ्यांच्या माजाने घेतलेला एका डॉक्टरचा बळी आहे, हे आपण मान्य करता काय?

३. महिला डॉक्टचे खासदारांशी बोलणे करून देणारे ते दोन पीए कोण?

४. हे खासदार महोदय नेमके कोण?

५. या महिला डॉक्टरला बीड वरून हिनवणारे पीआय महाडिक कुठे आहेत? त्यांच्यावर कारवाई काय झाली?

६. ‘पारदर्शक’ आणि ‘गतिमान’ शासन म्हणता, मग हा साधा माहिती अधिकाराचा अर्ज दोन महिने का निकाली निघाला नाही?

७. चॉकलेट गोळ्या वाटून निवडणूक जिंकणारे पालकमंत्री तेव्हा कोणत्या शेतात स्ट्रॉबेरी लावत होते?

८. या डॉक्टरने आपल्या जबाबात सत्य परिस्थिती मांडलेली असताना डीन किंवा अधीक्षकांनी काय कारवाई केली?

आज लाडकी बहीण पेक्षा सुरक्षित बहीण योजनेची जास्ती गरज आहे. फडणवीस जी, तुमच्या पंखाखाली वाढलेले कोल्हे-कुत्रे, आया बहिणींचे लचके तोडत असतील तर गृहमंत्री म्हणून आपण नापास आहात.. राजीनामा द्या!