धनंजय मुंडेंकडून एसआयटी चौकशीची मागणी
साताऱ्यातील फलटण येथील उपजिल्हा रुग्णालयात कार्यरत असलेल्या एका महिला डॉक्टरच्या आत्महत्येमुळे आता आरोग्य आणि पोलीस व्यवस्थेविरोधात गंभीर प्रश्नचिन्ह उभे राहिले आहे. वरिष्ठांच्या कथित दबावामुळे आणि पोलीस अधिकाऱ्याने केलेल्या बलात्कारामुळे या डॉक्टरने आत्महत्या केल्याची धक्कादायक घटना उघडकीस आली आहे. विशेष म्हणजे, यासंदर्भात तिने यापूर्वी पोलीस उप-अधीक्षकांकडेही तक्रार नोंदवल्याची माहिती समोर आली आहे. या गंभीर प्रकरणाची दखल घेत राज्याचे माजी मंत्री धनंजय मुंडे यांनी तातडीने एसआयटी (SIT) चौकशीची मागणी केली आहे.
धनंजय मुंडेंची भूमिका:
मूळच्या बीड जिल्ह्यातील वडवणी तालुक्यातील असलेल्या या महिला डॉक्टरच्या मृत्यूवर शोक व्यक्त करताना माजी मंत्री धनंजय मुंडे यांनी एक फेसबुक पोस्ट केली आहे.
काय म्हटले आहे धनंजय मुंडेंनी?
“सातारा जिल्ह्यातील फलटण येथे रुग्णसेवेत असलेल्या व मूळच्या बीड जिल्ह्यातील वडवणी तालुक्यातील महिला डॉक्टर यांच्याबाबत घडलेली घटना अत्यंत दुर्दैवी आहे. माझ्या त्या डॉक्टर भगिनीला भावपूर्ण श्रद्धांजली. तिच्या अकाली निधनाने कुटुंबियांवर कोसळलेल्या दुःखात मी सहभागी आहे.”
या घटनेतील दोषींना कठोर शासन व्हावे, तसेच ती ‘मुंडे’ आहे व बीडची आहे म्हणून तिने केलेल्या तक्रारी वरिष्ठांनी डावलल्या असतील, तर हे अतिशय गंभीर आहे. या संपूर्ण प्रकरणाची स्वतंत्र एसआयटी नेमून चौकशी करण्यात यावी. तसेच, हे प्रकरण जलदगती न्यायालयात (Fast Track Court) चालवले जावे व दोषींना कडक शासन व्हावे, यासाठी उद्या (शनिवारी) राज्याचे मुख्यमंत्री महोदयांना पत्र देणार आहे,” असे मुंडे यांनी स्पष्ट केले आहे.