परळी वैजनाथ : कृषी विभागातील अधिकाऱ्याची आत्महत्या
परळी वैजनाथ (प्रतिनिधी): बीड पंचायत समितीमधील कृषी विभागामध्ये कार्यरत असलेल्या एका विस्तार अधिकाऱ्याने आज परळी शहरात गळफास घेऊन आत्महत्या केल्याची धक्कादायक घटना गुरुवारी (दि. ११) सकाळी घडली. या घटनेमुळे प्रशासकीय विभागात एकच खळबळ उडाली आहे.
आत्महत्या करणाऱ्या अधिकाऱ्याचे नाव विलास डोंगरे (रा. ह. मु. शिवाजी नगर, परळी) असे आहे. ते मूळचे तालुक्यातील खामगाव येथील रहिवासी होते. विलास डोंगरे हे बीड येथील पंचायत समितीतील कृषी विभागात विस्तार अधिकारी म्हणून कार्यरत होते. त्यांनी आज सकाळी परळी शहरामध्ये गळफास घेऊन आपले जीवन संपवले. त्यांच्या आत्महत्येचे नेमके कारण अद्याप स्पष्ट होऊ शकलेले नाही.
विलास डोंगरे यांनी परळी पंचायत समिती अंतर्गत अनेक वर्षांपासून काम केले होते. त्यांच्या पश्चात तीन मुली, आई, पत्नी, भाऊ असा मोठा परिवार आहे. त्यांच्या अकाली निधनाने सर्वत्र हळहळ व्यक्त होत आहे. पोलीस पुढील तपास करत आहेत.