ओबीसी नेते लक्ष्मण हाकेंना धमकी मिळाल्याचा व्हिडीओ त्यांनी शेअर केला आहे. त्यांनी मनोज जरांगे यांच्या समर्थकांकडून धमकी मिळाल्याचा आरोप केला आहे, ज्यामुळे मोठी खळबळ माजली आहे. व्हिडीओमध्ये लक्ष्मण हाके फोनवर बोलत असताना समोरील व्यक्ती त्यांना धमकी देत असल्याचे दिसते. “उठसूठ तुम्ही मराठ्यांना बोलताय, मनोज जरांगेंना बोलताय,” असे समोरील व्यक्ती म्हणतो. त्यावर लक्ष्मण हाके उत्तर देतात, “मनोज जरांगे यांनीही स्वत:चं घरदार बघाव ना.” त्यावर समोरील व्यक्ती शिव्यांचा भडिमार करत, “तुमची तेवढी लायकी नाही,” असे म्हणतो. या व्हिडीओनंतर मोठी खळबळ माजली आहे.
धमकी मिळाल्यानंतर लक्ष्मण हाके यांनी पत्रकार परिषद घेत खुलासा केला आहे. “मला राज्यभरातून शेकडो धमक्यांचे फोन येत आहेत, जीवे मारण्याच्या धमक्या येत आहेत. मला शिवीगाळ केली गेली. मला जीवे मारण्याची धमकी दिलीय, महाराष्ट्रात हे काय सुरू आहे?” असा सवाल हाके यांनी उपस्थित केला. “मी कुठेही आरोपीची बाजू घेतलेली नव्हती. बीड प्रकरणामध्ये सोशल वर्कर्सनी आणि लोकप्रतिनिधींनी आरोपींची आडनावं शोधून, एका कम्युनिटीला क्रिमिनलाईज्ड ठरवण्याचा प्रयत्न केला. तू कम्युनिटी माझ्या ओबीसी प्रवर्गांतर्गत येते, त्या आरोपींची आडनावं शोधून, त्या आडनावांवरून एका समजाला टार्गेट केलं गेलं. त्यावेळी मी एक ओबीसी आंदोलक म्हणून पुढे आलो,” असे ते म्हणाले.
“लातुरात आमदाराचा साथीदार धनगर युवकाला ऑनर किलिंगमधून ठार करतो पण कारवाई काहीच होत नाही. त्यावर समोरच्यांचे मला रोज धमक्यांचे फोन येताहेत. आजही प्रेसच्या आधी धमकीचा फोन आला. आम्ही सामाजिक न्यायाची भूमिका मांडत असताना मला जातीवादी ठरवलं जातंय. लातुरात ऑनर किलिंग झालं त्याचा का निषेध केला जात नाही?” असा सवालही हाके यांनी उपस्थित केला.
“या गुन्ह्यातील डुरे नावाच्या आरोपीचे आमदार अभिमन्यु पवारसोबत फोटो आहेत मग त्यावर का कोणी बोलत नाही? ओबीसी बांधवांसाठी आवाज उठवत असल्यामुळेच मला टार्गेट केलं जातंय. बीड हत्याकांडावरून वंजारी समाजाला टार्गेट केलं जातंय. कालच बीडात एका ट्रँक्टर चालकाला मारहाण झाली, आडनाव विचारून ही मारहाण झाली,” असे म्हणत हाके यांनी अनेक आरोप केले.