परळी, दि. ११ (प्रतिनिधी) – परळीकडे धर्मापुरी येथून आणला जात असलेला ४ लाख ७८ हजार ५०० रुपयांचा गुटखा परळी ग्रामीण पोलिसांनी शुक्रवारी, दि. १० रोजी रात्री जप्त केला. या प्रकरणी परळी ग्रामीण पोलिस ठाण्यात पाच जणांविरोधात गुन्हा दाखल करण्यात आला आहे.
महाराष्ट्रात गुटखा बंदी असूनही परळी शहरात त्याची सर्रास विक्री होत असल्याचे आढळले आहे. परळी हे गुटख्याच्या विक्रीचे केंद्र बनले होते. जिल्हा पोलिस अधिक्षक नवनीत कॉवत यांनी पदभार घेताच बीड जिल्ह्यात गुटखाबंदी केली असली तरी परळी शहरात गुटख्याची आवक थांबलेली नाही. धर्मापुरी येथून परळीकडे गुटखा येत असल्याची माहिती मिळाल्यानंतर पोलिस उपअधीक्षक चोरमले यांच्या पथकाने परळी-धर्मापुरी मार्गावरील सिमेंट फॅक्टरीजवळ वाहनांची तपासणी केली.
रात्री ८.५० वाजता, हुंदाई कार क्रमांक एम.एच.३८ झेड २१२१ मधून परळीकडे येत असलेला २ लाख १० हजार ६०० रुपयांचा विमल पानमसाला, ५२ हजार ५०० रुपयांचा नवरत्न पानमसाला, ५३ हजार ८२० रुपयांचा व्ही १ टोबॅको, ६ हजार ६०० रुपयांचा व्ही १ टोबॅको, ५५ हजार रुपयांचा पानमसाला असा एकूण ३ लाख ७८ हजार ५०० रुपयांचा गुटखा जप्त करण्यात आला.
याप्रकरणी रहेमतअली कटुमियाँ सय्यद, मतीन समदानी शेख (दोघेही रा. मलिकपुरा, परळी), अजिजलाला कुरेशी, हकीम कुरेशी (आझादनगर), अनंत मुंजाजी फले (कृष्णानगर) या पाच जणांविरोधात गुन्हा दाखल करण्यात आला आहे.