मस्साजोगचे सरपंच संतोष देशमुख यांच्या हत्या प्रकरणातील मुख्य आरोपी म्हणून संशयित असलेल्या वाल्मिक कराड यांनी आज पुण्यात सीआयडी कार्यालयात शरणागती पत्करली. संतोष देशमुख यांच्या हत्येप्रकरणी वाल्मिक कराड मागील तीन आठवड्यांपासून फरार होते. या प्रकरणात आतापर्यंत चार जणांना अटक करण्यात आली असून, आणखी तीन आरोपी अद्याप फरार आहेत. फरार असलेल्या आरोपींच्या यादीत वाल्मिक कराड यांचेही नाव होते, आणि त्यांचा शोध सीआयडीकडून सुरू होता.
तर मी शिक्षा भोगायला तयार – वाल्मिक कराड
सीआयडी कार्यालयात शरण जाताना वाल्मिक कराड यांनी स्वतःचा एक व्हिडिओ शेअर करत आपली भूमिका स्पष्ट केली. त्यांनी म्हटले, “मी वाल्मिक कराड, केज पोलीस ठाण्यात माझ्या विरोधात खोटी खंडणीची फिर्याद दाखल करण्यात आली आहे. मला अटकपूर्व संरक्षण असूनही, मी पुण्यातील पाषाण येथील सीआयडी कार्यालयात शरण जात आहे. संतोष देशमुख यांचे जे खरे मारेकरी असतील, त्यांना अटक करून फाशीची शिक्षा द्यावी. मात्र, राजकीय दबावामुळे माझे नाव या प्रकरणात जोडले जात आहे. पोलीस तपासाचे निष्कर्ष येऊ द्या, आणि जर मी दोषी ठरलो, तर मला शिक्षा भोगायला कोणताही आक्षेप नाही.”
वाल्मिक कराड यांच्या शरणागतीमुळे प्रकरणातील तपासाला आता वेग येण्याची शक्यता आहे.