धनंजय मुंडे आणि पंकजा मुंडे हे भाऊ-बहीण एकत्र आल्याने महायुती आणि विरोधी आमदारांनी धनंजय मुंडेंना संपवण्यासाठी प्रयत्न सुरू केले आहेत. भाजपचे आमदार सुरेश धस यांनी त्याची सुपारी घेतली आणि एक सामाजिक कार्यकर्तीला कामाला लावल्याचा आरोप राष्ट्रवादीचे आमदार आणि प्रवक्ते अमोल मिटकरी यांनी केला आहे.
बीडचे सरपंच संतोष देशमुख हत्या प्रकरणी राज्याचं राजकीय वातावरण चांगलंच तापलं आहे. या प्रकरणातील प्रमुख आरोपी हे बीड राष्ट्रवादी पक्षाशी संबंधित आहेत. तसेच धनंजय मुंडे यांचा निकटवर्तीय समजला जाणारा वाल्मिक कराड हा त्या संबंधित खंडणी प्रकरणातील मुख्य आरोपी आहे. यावरून आरोप-प्रत्यारोप होत असताना अमोल मिटकरी यांनी धनंजय मुंडे यांच्या समर्थनार्थ सोशल मीडियावर पोस्ट शेअर केली आहे.
सुरेश धस यांच्यावर आरोप
सुरेश धस यांना मंत्रिपद हवं होतं. पण त्यांना मंत्रिपद न मिळता ते मुंडे बहीण-भावाला मिळाल्याने त्यांच्या पोटात दुखतंय. त्यामुळेच त्यांनी धनंजय मुंडे यांच्याविरोधात टीका करण्याचं काम सुरू केल्याचा आरोप अमोल मिटकरी यांनी केला. बीड प्रकरणात अजित पवार आणि धनंजय मुंडे यांना टार्गेट केलं जातंय. हे काम भाजपचे आमदार सुरेश धस यांच्या माध्यमातून केलं जातंय. यामागे संजय राऊत असल्याचा आरोपही मिटकरी यांनी केला.
अंजली दमानिया यांच्यावर टीका
अमोल मिटकरी यांनी नाव न घेता अंजली दमानिया यांच्यावर टीका केली. धनंजय मुंडे यांचे राजकारण संपवण्यासाठी सामाजिक कार्यकर्त्या कामाला लावल्याचा आरोप मिटकरी यांनी केला.
अमोल मिटकरी यांचे वक्तव्य
अमोल मिटकरी म्हणाले, “केवळ पंकजाताई व धनंजय मुंडे हे दोघे बहीण भाऊ एकत्र आल्याने महायुतीचे व विरोधातील आमदार एकत्र येऊन आमदार सुरेश धस यांच्या माध्यमातून जाणीवपूर्वक धनंजय मुंडे यांच्या राजकीय कारकिर्दीला संपवण्याचं पद्धतशीर काम करत आहेत. त्यासाठी एक सामाजिक कार्यकर्त्या कामाला लावल्या आहेत.”
संजय राऊत व सुरेश धस यांनी यात उपमुख्यमंत्री अजित पवार यांना टार्गेट करणे सुरु केले आहे. या हत्याकांडातील आरोपी फासावर गेले पाहिजे, ही धनंजय मुंडेंची सुरुवातपासून भूमिका असताना या प्रकरणात धनंजय मुंडे यांचं राजकारण संपवण्याची सुपारी घेतल्याच्या भूमिकेत धस आले आहेत.