बीड तालुक्यातील पिंपळनेर पोलीस स्टेशनच्या हद्दीत लिंबारुई देवी येथील शेतकरी जगन्नाथ ज्ञानोबा नांदे (वय 55) यांच्यावर काठीने बेदम मारहाण करण्यात आली आणि त्यांची मोटारसायकल जाळून टाकली. ही घटना रविवारी रात्री घडली. या हल्ल्यामुळे शेतकऱ्यांत भीतीचे वातावरण निर्माण झाले आहे.
शेतकरी जगन्नाथ नांदे यांनी रात्री 8 वाजण्याच्या सुमारास शेतात गहू, हरभरा आणि भुईमूग पिकांसाठी पाणी दिले होते. त्यानंतर ते शेतात बाजावर बसले होते. यावेळी अचानक अज्ञात तीन जणांनी त्यांच्यावर काठीने बेदम मारहाण करून प्राणघातक हल्ला चढवला, ज्यामुळे ते बेशुद्ध झाले. रस्त्यावर लावलेली मोटारसायकल (MH 13BW3293) देखील जाळली.
शेतकरी नांदे यांचे बंधू भास्कर नांदे यांनी पिंपळनेर पोलीस ठाण्यात (Pimpalner Police Station) फिर्याद दिली आहे. या घटनेनंतर ग्रामस्थांतून मारहाण करणाऱ्यांचा तत्काळ शोध घेऊन अटक करण्याची मागणी होत आहे. पिंपळनेर पोलिसांनी घटनास्थळाचा पंचनामा केला आहे.