भीषण अपघात: बसने दोनशे फूट फरफटत नेली दुचाकी
गेवराई दि. 22 : भरधाव एसटी बसने दुचाकीला जोरदार धडक दिल्याने 45 वर्षीय जिल्हा परिषद शिक्षकाचा जागीच मृत्यू झाला. हा भीषण अपघात गेवराई-शेवगाव रस्त्यावरील महारटाकळी येथे रविवारी सकाळी 8 वाजण्याच्या सुमारास घडला.
फय्याज खान (वय 45, रा. महारटाकळी, ता. गेवराई) असे अपघातात मृत्यू झालेल्या शिक्षकाचे नाव आहे. फय्याज खान हे तालुक्यातील अर्धपिंपरी येथील जिल्हा परिषद शाळेत कार्यरत होते. ते रोज सकाळी आपल्या गावालगत असलेल्या क्रिकेट मैदानावर खेळायला जात होते. रविवारी सकाळी 8 वाजता क्रिकेट खेळून परतत असताना माजलगाव-पुणे या बसने (एम.एच.13 सी.यू.7836) त्यांच्या दुचाकीला जोराची धडक दिली.
हा अपघात एवढा भयंकर होता की, बसने फय्याज खान यांना त्यांच्या दुचाकीसह जवळपास दोनशे फूट फरफटत नेले. प्रत्यक्षदर्शींनी दिलेल्या माहितीनुसार, या अपघातात फय्याज खान यांचा जागीच मृत्यू झाला. अपघाताची माहिती मिळताच चकलांबा पोलिस घटनास्थळी दाखल झाले आणि त्यांनी पंचनामा करून मृतदेह शवविच्छेदनासाठी चकलांबा येथील प्राथमिक आरोग्य केंद्रात आणला. अपघातानंतर या रस्त्यावर मोठी वाहतूक कोंडी झाली होती.