मतदान प्रक्रिया : परळी विधानसभेत शांततेसाठी विशेष मागणी
परळी वैद्यनाथ – उद्या, 20 नोव्हेंबर रोजी विधानसभा निवडणुकीची मतदान प्रक्रिया पार पडणार आहे. या पार्श्वभूमीवर परळी विधानसभेचे उमेदवार धनंजय मुंडे यांनी परळीतील सर्व प्रमुख उमेदवारांना पोलीस संरक्षण आणि शासकीय कॅमेरा सर्व्हेलन्स देण्याची मागणी पोलीस अधीक्षक अविनाश बारगळ यांच्याकडे पत्राद्वारे केली आहे.
परळीतील प्रत्येक निवडणूक अत्यंत शांततेत पार पडते. मात्र, मागील काही वर्षांचा अनुभव पाहता काही उमेदवार आणि कार्यकर्ते अफवा पसरवून संभ्रम निर्माण करतात की त्यांना अडवणूक, मारहाण किंवा हल्ला झाला आहे. या अफवांमुळे परळी आणि बीड जिल्ह्याची बदनामी होते. त्यामुळे सर्व प्रमुख उमेदवारांसाठी पोलीस संरक्षण आणि कॅमेरा सर्व्हेलन्स देण्याची मागणी धनंजय मुंडे यांनी केली आहे.
निवडणूक प्रक्रिया म्हणजे लोकशाहीचा उत्सव आहे. संपूर्ण मतदान प्रक्रिया शांततेत पार पडावी आणि मतदानाचा टक्का वाढावा यासाठी व्यापक प्रयत्न व्हावेत. कुठेही काही अनुचित प्रकार घडू नये, आणि घडल्यास त्याचे चित्रीकरण केल्याने पोलिसांकडे दोषसिद्धीसाठी ठोस पुरावा असेल. त्यामुळे पोलीस संरक्षण आणि शासकीय कॅमेरामन सर्व प्रमुख उमेदवारांच्या सोबत असावा, असे धनंजय मुंडे यांनी आपल्या पत्रात म्हटले आहे.
धनंजय मुंडे यांनी विरोधी उमेदवारांसह जनतेचे आणि कार्यकर्त्यांचे आभार मानले आहेत. मागील एक महिन्यापासून निवडणूक रणधुमाळी, प्रचार इत्यादी सर्व बाबी अत्यंत खेळीमेळीच्या वातावरणात आणि शांततेत पार पडल्या. त्यांनी सर्वांनी मिळून संपूर्ण मतदान प्रक्रिया देखील शांततेत पार पाडावी, असे आवाहन केले आहे.