घरच्यांनी प्रेमसंबंधाला विरोध केल्यामुळे संपवली जीवनयात्रा
(24 May) हिमायतनगर तालुक्यातील मौजे कामारवाडी येथील दत्ता गणेश भिंगोरे (वय 24) आणि शारदा खंडू माने (वय 25 वर्ष रा. चिकाळा, सध्या मुक्काम कामारवाडी) या दोघांमध्ये मागील अनेक दिवसापासून प्रेम संबंध जुळले होते. विवाहित असलेली ती युवती आपल्या पतीसोबत वारंवार होत असलेल्या भांडणामुळे मागील 4 वर्षांपासून कामारवाडी येथे असलेल्या मामाच्या घरी वास्तव्यास होती.
यामध्ये या दोघांचे प्रेमसंबंधाची माहिती नातेवाईकांना समजली आणि त्यांनी व दत्ता नामक युवकाच्या घरच्यांनी दोघाच्या प्रेमसंबंधाला विरोध केला. त्यामुळे दत्ताच्या आई-वडिलांनी त्याचे लग्न करण्याचे ठरविले आणि सोयरिकही करण्यात आली होती. मात्र दत्ता शारदासोबत लग्न करण्याच्या विचारात होता. नातेवाईकांचा वाढता विरोध पाहून त्यांनी टोकाचे पाऊल उचलले.
शनिवारी सकाळी गावालागत असलेल्या वानखेडे यांच्या शेतातील लिंबाच्या झाडाला नायलॉन दोरीने गळफास घेऊन त्यांनी आपली जीवनयात्रा संपवली. नांदेडमधील हिमायतनगर तालुक्यातील कामारवाडी येथे प्रेमी युगलाने आत्महत्या केल्याने सर्वत्र खळबळ उडाली आहे. ही घटना सकाळी उघडकीस येताच कामारवाडीचे पोलीस पाटील नागोराव भिंगोरे यांनी हिमायतनगर पोलीस ठाण्याला माहिती दिली. पोलिसांनी घटनास्थळी दाखल होत दोघांचे मृतदेह हिमायतनगर येथील ग्रामीण रुग्णालयात शवविच्छेदनासाठी पाठवले.