मुंबई : इंडियन ओव्हरसीज बँकेने एमसीएलआर ०.१० टक्के कमी करण्यात येत असल्याचे सोमवारी जाहीर केले. नवा कर्जदर १० सप्टेंबरपासून लागू केला जाणार आहे. यामुळे बँकेचा एक वर्षे मुदतीच्या एमसीएलआर कर्जांचा दर आता ७.६५ टक्क्यांवरून ७.५५ टक्क्यांवर आला आहे. त्याचप्रमाणे तीन महिने व सहा महिने मुदतीच्या एमसीएलआर कर्जांचा दर ७.५५ वरून ७.४५ टक्के करण्यात आला आहे.
सार्वजनिक क्षेत्रातील (सरकारी) बँक ऑफ महाराष्ट्र आणि इंडियन ओव्हरसीज बँक यांनी निधी आधारित कर्जदरामध्ये (एमसीएलआर) ०.१० टक्के कपात केली आहे. यामुळे या दोन्ही बँकांची एमसीएलआर कर्जे स्वस्त होणार आहेत. महाबँकेने नवे कर्जदर सोमवारी लागू केले.
बँक ऑफ महाराष्ट्रनेही (महाबँक) एक वर्ष मुदतीच्या एमसीएलआर कर्जांचा दर ७.४० वरून ७.३० टक्के केला आहे. सहा महिने मुदतीच्या एमसीएलआर कर्जांसाठी आता ७.३० ऐवजी ७.२५ टक्के दर लागणार आहे. पंधरा दिवस, एक महिना व तीन महिने मुदतीच्या एमसीएलआर कर्जांसाठी अनुक्रमे ६.८०, ७ व ७.२० टक्के दर लागू केला जाणार आहे.
करोना संकटातून अर्थव्यवस्थेला बाहेर काढण्यासाठी RBIकडे आणखी उपाय योजना आहेत. भविष्यात देखील व्याज दरात कपात केली जाईल, असे संकेत रिझर्व्ह बँकेचे गव्हर्नर शक्तिकांत दास यांनी नुकताच दिले होते. व्याज दरात कपात असो किंवा अन्य उपाय योजना; आमच्या भात्यातील बाण अजून संपले नाहीत, अशा शब्दात भारतीय रिझर्व्ह बँकेचे गव्हर्नर शक्तिकांत दास यांनी भविष्यातील धोरणांचे संकेत दिले. RBIने गेल्या दोन पतधोरकणात व्याजदरात १.१५ टक्के इतकी कपात केली आहे.
भविष्यात व्याज दरात आणखी कपात करण्याचे संकेत देत दास यांनी करोना व्हायरसपासून अर्थव्यवस्थेला वाचवण्यासाठीच्या उपाय योजना इतक्यात मागे घेतली जाणार नाही असे स्पष्ट केले. सध्या रेपो दर चार टक्के आहे तर रिव्हर्स रेपो ३.३५ टक्के इतका आहे. Facility चा दर ४.२५ इतका आहे.करोना व्हायरसमुळे अर्थव्यवस्थेची होत असेली घसरण रोखण्यासाठी आणि पुन्हा त्याला रुळावर आणण्यासाठी काळजीपूर्वक पाउल उचलले पाहिजे. एका कार्यक्रमात बोलताना ते म्हणाले की, कोणत्याही पद्धतीने असे मानू नये की आरबीआय उपाय योजना लवकर मागे घेईल.