बीड(प्रतिनिधी):- मराठा आरक्षणासाठी आत्मबलिदान दिलेल्यांच्या कुटुंबियांना न्याय द्यावा यासाठी शिवसंग्राम, मराठा समन्वय समितीतील सहभागी संघटना, मराठा क्रांती मोर्चासह इतर संघटना गेल्या कित्येक महिन्यांपासून प्रयत्न करत आहेत. मराठा समन्वय समितीकडून समाजाच्या प्रमुख मागण्यांसाठी राज्यभरात आंदोलन सुरु करण्यात आले आहे. याच पार्श्वभूमीवर मंत्री एकनाथ शिंदे यांनी आ विनायक मेटे यांना व आत्मबलिदात्यांच्या कुटुंबियांना येत्या काही दिवसांत आर्थिक मदत व नौकरी देण्याबाबत निर्णय घेण्यात येणार असल्याचे ३० जुलै २०२० रोजी म्हंटले होते. याचा निर्णय मंत्रिमंडळ बैठकीत घेऊन लवकरात लवकर देऊ असे जाहीर करण्यात आले आहे.
बीड मराठा आरक्षण मागणी मंजूर व्हावी यासाठी राज्यामध्ये बीड जिल्ह्यात सर्वाधिक 10 तरुणांनी आपले आत्मबलिदाने केले आहे. काल त्यांच्या कुटुंबियांनी बीड येथे आ विनायक मेटे यांची भेट घेऊन चर्चा केली. यावेळी आ विनायक मेटे यांनी पुढील आठवड्यात राज्यातील सर्व बलिदान देणाऱ्या शूरवीरांच्या कुटुंबियांना आर्थिक मदत व नोकरी मिळेल यासाठी प्रयत्न करतोय, समाजासाठी कायम संघर्षात असल्याचा शब्द उपस्थित कुटुंबियांना दिला. यावेळी मराठा क्रांती मोर्च्याचे सीए बी बी जाधव, ऍड मंगेश पोकळे आदींची उपस्थिती होती.
कुटुंबियांच्या चेहऱ्यावर आपला मुलगा, भाऊ, नवरा गेल्याचे दुःख दिसत होते, तर मराठा आरक्षणाच्या बाबतीत सरकारच्या भूमिकेबाबत चिंता दिसत होती, आणि दुसऱ्या बाजूला अनेक वर्षांच्या संघर्षानंतर आपल्या कुटुंबियांबद्दल नोकरी व आर्थिक मदत देऊन सरकार जाण ठेवायला लागलेले आहे याबद्दल त्या सर्व कुटुंबीयांनी समाधान व्यक्त केले होते. आत्मबलिदान दिलेल्या दिवसापासून आ विनायक मेटे हे या कुटुंबियांच्या अडीअडचणींना धावून जात आहेत, याबद्दल त्या सर्व १० कुटुंबियातील सदस्यांनी शिवसंग्रामचे आभार मानले. यावेळी आ मेटे म्हणाले कि, पूढील आठवड्यात राज्यातील सर्व बलिदान देणाऱ्या शूरवीरांच्या कुटुंबियांना आर्थिक मदत व नोकरी मिळेल यासाठी सरकारकडे प्रयत्न करतोय, काही अडचण आल्यास केव्हाही संपर्क करा. आपला मुलगा, भाऊ, आई, नवरा गेल्याचे दुःख आम्ही जाणत आहोत. संपूर्ण समाज आपणासाठी जेव्हा गरज पडेल तेव्हा धावून येईल. समाजाच्या प्रश्नासाठी मी कायम संघर्षात असल्याचे ते यावेळी म्हणाले.