पुणे: लोहगाव येथील अजिंक्य डी. वाय. पाटील विद्यापीठाच्या दहाव्या दीक्षांत समारंभात भाजपच्या नेत्या पंकजा मुंडे यांना शिक्षण क्षेत्रातील सर्वोच्च मानली जाणारी ‘मानद डॉक्टरेट’ (डी.लिट.) पदवी प्रदान करण्यात आली. पंकजा मुंडे यांनी राजकीय आणि सामाजिक क्षेत्रात केलेल्या प्रदीर्घ कार्याची दखल घेऊन विद्यापीठाच्या वतीने हा विशेष सन्मान करण्यात आला आहे. विद्यापीठाचे कुलपती डॉ. अजिंक्य पाटील, रिपब्लिक ऑफ गयानाचे हाय कमिशनर श्री. धरमकुमार सिरजी, भारत सरकारचे मुख्य सल्लागार डॉ. निशिकांत ओझा आणि विद्यापीठाच्या अध्यक्षा पूजा पाटील यांच्या प्रमुख उपस्थितीत हा सोहळा संपन्न झाला.
या प्रसंगी बोलताना पंकजा मुंडे भावूक झाल्या होत्या. कौटुंबिक आणि राजकीय जबाबदाऱ्यांमुळे उच्च शिक्षणाचे स्वप्न अधुरे राहिले होते, मात्र आज मिळालेली ही पदवी म्हणजे कष्टांचे फळ असल्याची भावना त्यांनी व्यक्त केली. मनाच्या कोपऱ्यात जपलेले शिक्षणाचे स्वप्न अशा प्रकारे पूर्ण होईल, अशी अपेक्षा नव्हती, असे म्हणत त्यांनी ज्युरी आणि विद्यापीठाचे मनापासून आभार मानले. या सोहळ्याला मोठ्या संख्येने प्राध्यापक आणि विद्यार्थी उपस्थित होते, ज्यांनी टाळ्यांच्या कडकडाटात पंकजा मुंडे यांचे अभिनंदन केले.