अहिल्यानगर :आणि बीड जिल्ह्याच्या सीमेवर एक अत्यंत खळबळजनक घटना घडली आहे, जिथे शरद पवार गटाचे नेते आणि सामाजिक कार्यकर्ते राम खाडे यांच्यावर बुधवारी रात्री (२६ नोव्हेंबर २०२५) दहा ते पंधरा जणांच्या टोळक्याने जीवघेणा हल्ला केला. खाडे हे मांदळी गावातून बीड जिल्ह्याकडे येत असताना, मांदगावजवळ रस्त्यावर त्यांच्या गाडीला थांबवून हा हल्ला करण्यात आला. हल्लेखोरांनी सुरुवातीला त्यांच्या गाडीची नासधूस केली, जोरदार दगडफेक करत गाडीचे साईड मिरर फोडले. यानंतर, तोंडाला रुमाल बांधलेल्या या हल्लेखोरांनी लाठ्या, तलवार आणि धारदार सत्तूर यांसारख्या शस्त्रांनी त्यांच्यावर हल्ला चढवला.
या भीषण हल्ल्यात राम खाडे यांना गंभीर दुखापत झाली आहे; त्यांनी अनेक वार हातावर झेलले, ज्यामुळे त्यांचा हात रक्तबंबाळ झाला. त्यांच्यासह त्यांचे सहकारी दीपक खिळे आणि अन्य दोघेही गंभीर जखमी झाले आहेत. हल्ल्यामुळे त्यांची शुद्ध पूर्णपणे हरपली होती. तातडीने त्यांना अहिल्यानगरमधील एका खासगी रुग्णालयात उपचारांसाठी दाखल करण्यात आले. मात्र, त्यांची प्रकृती चिंताजनक असल्याने, पुढील उपचारासाठी त्यांना तातडीने पुण्याच्या रुग्णालयात हलवण्यात आले आहे. पोलिसांनी या घटनेचा तपास सुरू केला असला तरी, हा हल्ला नेमका कोणी केला, हे अद्याप स्पष्ट झालेले नाही. हल्ल्याच्या ठिकाणाहून पळताना एका हल्लेखोराच्या हातातून सत्तूर खाली पडल्याची माहिती आहे.
दरम्यान, या हल्ल्यामागे राजकीय द्वेष असल्याचे जखमी सहकारी दीपक खिळे यांनी आरोप केला आहे. राम खाडे यांनी अनेक लोकांचे भ्रष्टाचार उघड करून त्यांच्याविरोधात तक्रारी केल्या होत्या. याच कारणामुळे हा जीवघेणा हल्ला घडवून आणण्यात आला, असा त्यांचा दावा आहे. त्यामुळे हल्लेखोरांसह हा हल्ला घडवून आणणाऱ्या मुख्य सूत्रधारालाही त्वरित अटक करण्याची मागणी खिळे यांनी केली आहे. मात्र, या गंभीर घटनेनंतरही रात्री उशिरापर्यंत या प्रकरणी कोणताही गुन्हा दाखल झालेला नव्हता. या हल्ल्यामुळे अहिल्यानगर आणि बीड जिल्ह्यामध्ये खळबळ उडाली आहे आणि राजकीय क्षेत्रात मोठी चर्चा सुरू झाली आहे.