बीड/पिंपळनेर: भाजप नेत्या आणि माजी मंत्री पंकजा मुंडे यांचे स्वीय सहायक (PA) अनंत गर्जे यांच्या पत्नी डॉ. गौरी पालवे-गर्जे आत्महत्या प्रकरणाने राज्यात मोठी खळबळ उडाली आहे. गौरीच्या कुटुंबीयांनी ही आत्महत्या नसून हत्या असल्याचा दावा करत तिचा पती अनंत गर्जे याच्यावर आरोप केले आहेत. अनंत गर्जे सध्या अटकेत आहे.
या गंभीर घडामोडीनंतर, काल (मंगळवार, २५ नोव्हेंबर २०२५) पंकजा मुंडे यांनी बीड जिल्ह्यातील शिरूर कासार तालुक्यातील पिंपळनेर या गावी डॉ. गौरी गर्जे यांच्या निवासस्थानी जाऊन कुटुंबीयांची भेट घेतली आणि त्यांचे सांत्वन केले.
अश्रू अनावर: कुटुंबीयांनी मांडली व्यथा
पंकजा मुंडे यांना पाहताच गौरी गर्जे यांचे वडील अशोक पालवे यांनी अक्षरशः टाहो फोडला आणि अश्रूंनी आपली व्यथा मांडली. त्यांनी मुंडेंसमोर आपल्या मुलीला व कुटुंबाला न्याय मिळावा, अशी मागणी केली. हा संपूर्ण प्रसंग पाहून पंकजा मुंडेदेखील भावूक झाल्या होत्या.
“मला कल्पना असती तर मी दोन कानाखाली लावल्या असत्या”
यावेळी गौरीच्या वडिलांशी बोलताना पंकजा मुंडे यांनी या प्रकरणाबाबत आपल्याला काहीही माहिती नसल्याचे स्पष्ट केले. त्या म्हणाल्या, “मला गौरीच्या त्रासाबद्दल माहितीच नव्हती. नाहीतर मी अनंत गर्जेच्या दोन कानाखाली लावल्या असत्या. मला याबाबत काही माहितीच नाही. मी तर कळलं तेव्हा खालीच बसले.”
त्यांनी आपल्यावरील आरोपांचे खंडन करत अत्यंत भावनिक शपथ घेतली:
“भगवान बाबा आणि मुंडे साहेबांची शपथ घेऊन सांगते की मी या प्रकरणात कोणालाही फोन केलेला नाही. सोबतच कोणालाही वाचवण्याचा प्रयत्न केला नाही.”
पंकजा मुंडे यांनी स्पष्टीकरण दिले की, “माझ्याकडे दहा पीए आहेत. पगारी नोकरांच्या घरात काय चाललंय हे कसे माहिती होईल. हे असं काही आहे, ते नंतर मला समजलं.”
पोलीस तपास करतील, कोणीही सुटणार नाही
न्याय मिळवण्याच्या मागणीवर पंकजा मुंडे यांनी कुटुंबीयांना धीर दिला. त्या म्हणाल्या, “अनंत गर्जे याने गुन्हा केला असेल तर त्याला शिक्षा होणारच आहे. यातून कोणीही सुटणार नाही. माझ्याकडे गणपतीला आले होते, नटून थटून इतका सुंदर जोडा, मला काही माहिती नाही.”
त्यांनी कुटुंबीयांना धीर धरण्याची विनंती केली: “पोलीस ज्या केसमध्ये पुरावा नाही, अशा केसचाही छडा लावतात. या पूर्ण पृथ्वीवर अनंत गर्जेंची बाजू कोण घेतंय सांगा मला, कोण त्याच्यासोबत आहे का? पोलिसांना तपास तर करुन दिला पाहिजे ना. दोन दिवसात काय होणार आहे, पोलिस सर्व तपास करतील.”
मुंडे यांनी शेवटी अत्यंत कळकळीने म्हटले, “माझा मुलगा असा वागला असता तर मी त्यालाही पाठीशी घातलं नसतं. जरा धीर धरा, मला कसं वाटेल आपल्या लेकीसोबत असं व्हावं.”