ज्येष्ठ अभिनेते नाना पाटेकर हे त्यांच्या बेधडक आणि स्पष्टवक्तेपणामुळे नेहमीच चर्चेत असतात. छत्रपती संभाजीनगर येथील एका कार्यक्रमात बोलताना त्यांनी पुन्हा एकदा आपल्या खास शैलीत राजकारणी लोकांचे कान टोचले आहेत, खासकरून जाती-पातीचे राजकारण करणाऱ्या नेत्यांचा त्यांनी कठोर शब्दांत समाचार घेतला. तसेच, देशासाठी लढणाऱ्या सैनिकांना अपेक्षेनुसार मान-सन्मान मिळत नाही, याबद्दल त्यांनी तीव्र खंत व्यक्त केली.
जाती-पातीचे राजकारण करणाऱ्यांवर नानांचा प्रहार
समाजात फूट पाडणाऱ्या राजकारण्यांवर थेट हल्ला चढवताना नाना पाटेकर यांनी मतदारांना अत्यंत महत्त्वाचे आवाहन केले. ते म्हणाले, ‘काही राजकारणी आहेत जे जाती-धर्माच्या नावावर भेद करतात, ‘तू हा आहे, तू तो आहे’ असे म्हणून राजकारण करतात. मी स्वतः कधी जातपात मानली नाही, पण आपल्या देशात जातीचे राजकारण कोण आणि कसे करत आहे, हे सर्वांना माहीत आहे.’
अशा वृत्तीच्या नेत्यांना उत्तर देण्यासाठी मतदानाचा अधिकार वापरण्याचे आवाहन त्यांनी जनतेला केले. ‘यांना उत्तर मतदानातून द्यायचे,’ असे ते स्पष्टपणे म्हणाले. तसेच, तरुणांना उद्देशून ते म्हणाले की, ‘बदलाव तरुण आणू शकतात आणि तुम्ही सतर्क राहिलं पाहिजे. फक्त गर्दीचा भाग होऊ नका.’
सैनिकांच्या सन्मानाबद्दल व्यक्त केली खंत
राजकीय टीका करतानाच, नाना पाटेकर यांनी देशाच्या सैनिकांबद्दलच्या आपल्या भावना व्यक्त केल्या. देशाच्या सीमेवर लढणाऱ्या जवानांना त्यांच्या कार्यासाठी हवा तेवढा मान-सन्मान मिळत नाही, याची खंत त्यांना वाटत असल्याचे त्यांनी सांगितले. त्यांच्या या वक्तव्याने कार्यक्रमात उपस्थित असलेल्यांच्या भावनांना स्पर्श केला.