मुंबईतील केईएम रुग्णालयाच्या डॉक्टर गौरी पालवे आत्महत्या प्रकरणात सामाजिक कार्यकर्त्या अंजली दमानिया यांनी कठोर भूमिका घेत सरकार आणि पोलिसांना काही महत्त्वाचे प्रश्न विचारले आहेत. तसेच, मुख्य आरोपी अनंत गर्जेच्या वकिलावर त्यांनी तीव्र शब्दांत टीका केली आहे.
उर्वरित आरोपींना अटक का नाही?
अंजली दमानिया यांनी गौरीच्या पालकांशी झालेल्या संभाषणाचा संदर्भ देत सांगितले की, “आत्ताच्या घटकेला गौरीच्या आई-वडिलांशी माझं बोलणं झालं. त्यांचे म्हणणे आहे की, बाकीच्या दोन आरोपींना अद्याप अटक का झाली नाही? त्यांना तातडीने अटक झाली पाहिजे आणि त्यांचे स्टेटमेंट (जबाब) घेतले पाहिजे.”
भाजप नेत्या आणि मंत्री पंकजा मुंडे यांचे स्वीय सहायक (PA) असलेल्या अनंत गर्जे याला आत्महत्येसाठी प्रवृत्त केल्याच्या आरोपाखाली अटक झाली आहे. मात्र, गौरीच्या वडिलांनी (डॉ. पालवे) तिच्या नणंद आणि दीरालाही अटक करण्याची मागणी करत वरळी पोलिसांना पत्र दिले आहे. याच दिरंगाईवर दमानिया यांनी पोलिसांना सवाल केला आहे:
“त्या दोघांना अटक का होत नाही? सरकारी नोकर आहेत, म्हणून अटक केली जात नाही का? त्यांना त्वरित बोलावून त्यांचे स्टेटमेंट घेणे गरजेचे आहे.”
‘वकिलाचे बोलणे पूर्णतः खोटे‘
आरोपीच्या वकिलाने केलेल्या विधानांवर अंजली दमानिया यांनी जोरदार आक्षेप घेतला. वकील असे सांगत आहेत की, ‘गौरीच्या आई-वडिलांना 2021 मधील घटनेबद्दल माहिती होते.’ यावर दमानिया संतप्त होऊन म्हणाल्या:
“हे सर्व खोटं आहे. जर माहिती असतं, तर त्यांनी कधीही लग्न करून दिलं नसतं. हे जे वकील बोलतायेत, ते ‘अब्सोल्युटली रबिश’ (पूर्णतः निरर्थक) आहे.”
सीसीटीव्ही फुटेज पालकांना मिळावे
दमानिया यांनी पोलिसांच्या कार्यशैलीवर प्रश्नचिन्ह उभे करत तपासामध्ये होणाऱ्या दिरंगाईवर बोट ठेवले. त्यांनी गौरीच्या वडिलांच्या मागणीचे समर्थन केले.
* चौकशीची मागणी: “बाकीच्या दोन आरोपींची चौकशी झाली पाहिजे.”
* सीसीटीव्हीची मागणी: “त्या नवीन टॉवर बिल्डिंगचे पूर्ण दिवसभराचे सीसीटीव्ही फुटेज त्यांना हवे आहेत. कोण आले, कोण गेले हे त्यांना स्वतःला पाहायचं आहे.”
दमानिया यांनी इशारा दिला की, “हाय प्रोफाईल केसेस असल्या की गडबड होण्याचे खूप ‘चान्सेस’ असतात.” त्यामुळे, गौरीच्या वडिलांनी दिलेल्या पत्रानुसार, त्यांना तातडीने सीसीटीव्ही फुटेज उपलब्ध करून दिले जावे, अशी मागणी त्यांनी केली आहे.