बीड: बीड जिल्ह्यातील वडवणी न्यायालयात (Wadwani Court) सरकारी वकील विनायक लिंबाजी चंदेल (48) यांनी आत्महत्या केल्याची धक्कादायक घटना समोर आली आहे. न्यायालयाच्या आवारातील एका खोलीत त्यांनी गळफास घेऊन आपलं जीवन संपवलं. या घटनेमुळे जिल्ह्यात एकच खळबळ उडाली आहे.
मिळालेल्या माहितीनुसार, विनायक चंदेल यांनी आत्महत्या करण्यापूर्वी एक सुसाईड नोट लिहून ठेवली आहे. या नोटमध्ये काही गंभीर आरोप आणि माहिती असल्याचं सांगितलं जात आहे. यामुळे या प्रकरणाला एक वेगळं वळण लागलं असून पोलीस या प्रकरणाचा सखोल तपास करत आहेत.
वडवणी पोलीस ठाण्याच्या सहायक पोलीस निरीक्षक वर्षा वाघमारे घटनास्थळी पोहोचल्या असून तपास सुरू आहे. विनायक चंदेल हे आठ महिन्यांपूर्वीच वडवणी न्यायालयात रुजू झाले होते. त्यांची वकील म्हणून कारकीर्द चांगली होती. त्यांच्या अचानक आत्महत्येमुळे अनेक प्रश्न निर्माण झाले आहेत.
या आत्महत्येमागे नेमकं काय कारण आहे, याचा पोलीस शोध घेत आहेत. सुसाईड नोटमध्ये केलेले आरोप आणि त्यामागील सत्य लवकरच समोर येण्याची शक्यता आहे. या घटनेमुळे बीडच्या न्यायिक क्षेत्रात शोक व्यक्त होत आहे.