बीड जिल्ह्यात अवैध नागरिकांचा शोध घेण्यासाठी पोलिसांनी सक्रिय तपासणी सुरू केली आहे. यामध्ये बांगलादेशी नागरिक आणि इतर परदेशी नागरिकांचा समावेश आहे. पोलिसांनी अद्याप बीड जिल्ह्यात एकही पाकिस्तानी नागरिक वास्तव्यास असल्याचे आढळलेले नाही. तरीही, अवैधरीत्या वास्तव्यास असणाऱ्या नागरिकांची माहिती संकलित केली जात आहे, अशी माहिती पोलिसांनी दिली आहे.
जम्मू-काश्मीरमधील पहलगाम येथे झालेल्या दहशतवादी हल्ल्यानंतर, केंद्रीय गृहमंत्री अमित शाह यांनी सर्व राज्यांच्या मुख्यमंत्र्यांना सुरक्षा उपाययोजनांसाठी महत्त्वपूर्ण निर्देश दिले आहेत. याअंतर्गत, केंद्र सरकारने पाकिस्तानी नागरिकांसाठी जारी केलेले 18 प्रकारचे व्हिसा रद्द केले आहेत. या निर्णयामुळे, 27 एप्रिलपासून कोणताही पाकिस्तानी नागरिक भारतात थांबू नये, यासाठी कठोर कारवाईचे आदेश देण्यात आले आहेत.
केंद्र सरकारच्या या आदेशांनंतर महाराष्ट्रातील पोलीस यंत्रणा अधिक सतर्क झाली आहे. राज्यातील 48 शहरांमध्ये सध्या 5,023 पाकिस्तानी नागरिक वास्तव्यास असल्याचे राज्याचे गृहराज्यमंत्री योगेश कदम यांनी स्पष्ट केले आहे. त्यामुळे अवैध नागरिकांविरोधात तपासणी प्रक्रियेला गती मिळाली आहे.