बीड जिल्हा प्रशासनाने निवडणूक आयोगाला सादर केलेल्या अहवालानुसार, विधानसभा निवडणुकीदरम्यान (Maharashtra Vidhan Sabha Election 2024) बडतर्फ पोलीस अधिकारी रणजीत कासले यांची परळी मतदारसंघात कोणतीही ड्युटी नव्हती. निवडणूक प्रक्रियेदरम्यान कासले सायबर पोलीस ठाण्यात कार्यरत असल्याचे स्पष्ट करण्यात आले आहे.
कासले यांनी विधानसभा निवडणुकीत परळी मतदारसंघात बंदोबस्त दिल्याचा दावा केला होता. तसेच, ईव्हीएम मशीन ज्या ठिकाणी ठेवण्यात आल्या होत्या, त्या ठिकाणी बंदोबस्त असतानाही त्यांना हटविण्यात आल्याचे सांगितले होते. याशिवाय, त्यांच्या बँक खात्यावर दहा लाख रुपये पाठविण्यात आल्याचा उल्लेख असून, त्यातील साडेसात लाख रुपये परत केले आणि उर्वरित अडीच लाख रुपये निलंबनानंतर खर्च केल्याचा दावा त्यांनी केला होता.
निवडणूक आयोगाने मागवलेल्या माहितीनुसार, परळी मतदारसंघाशी संबंधित कोणत्याही मतदान केंद्र, स्ट्राँग रूम किंवा मतमोजणी केंद्रावर कासले यांची ड्युटी नव्हती. निवडणूक कालावधीत ईव्हीएम आणि स्ट्राँग रूमच्या सुरक्षेसाठी केंद्र व राज्य शासनाच्या सूचनेनुसार तीन-स्तरीय सुरक्षा व्यवस्था तैनात करण्यात आली होती.