मागील काही काळात बीड जिल्ह्यातील राजकीय वातावरण ढवळून निघाले आहे. नेत्यांच्या आणि कार्यकर्त्यांच्या ऑडिओ-व्हिडिओ क्लिप्स व्हायरल होत असून, त्यातून अनेक वादग्रस्त प्रकरणे समोर येत आहेत.
धनंजय मुंडेंना त्यांच्या मंत्रिपदाचा राजीनामा द्यावा लागला आहे. वाल्मिक कराड यांच्याशी असलेल्या जवळिकीमुळे संतोष देशमुख हत्याप्रकरणात त्यांना सहआरोपी म्हणून गुन्हा दाखल करण्याची मागणी होत आहे.
दुसरीकडे, आमदार सुरेश धस यांचा कार्यकर्ता खोक्या चर्चेत आहे. तसेच, आमदार संदीप क्षीरसागर यांची एक ऑडिओ क्लिप व्हायरल झाली आहे, ज्यामध्ये ते नायब तहसीलदारांना धमकी देत असल्याचे ऐकायला मिळते. या क्लिपबाबत क्षीरसागर यांनी प्रतिक्रिया देताना सांगितले की, ही क्लिप दीड वर्षांपूर्वीची आहे आणि ती आता समोर येण्यामागे दुसऱ्या प्रकरणावरून लक्ष हटवण्याचा प्रयत्न आहे.
त्यांनी असेही स्पष्ट केले की, कार्यकर्त्यांवर अन्याय होत असेल आणि तक्रारींना दखल मिळत नसेल, तर आक्रमक भूमिका घेणे गरजेचे ठरते. संतोष देशमुख हत्या प्रकरणातील आरोपींच्या वर्तनावरही त्यांनी टीका केली आणि भ्रष्ट अधिकाऱ्यांवर कारवाईची मागणी केली.