परळी, दि. १६ (प्रतिनिधी): बुधवारी सकाळी मुंबईवरून परळीत दाखल झालेले राज्याचे अन्न व नागरी पुरवठा मंत्री धनंजय मुंडे यांनी गुरुवारी दुपारी एक वाजता देशातील बारा ज्योतिर्लिंगापैकी एक असलेल्या श्री प्रभू वैद्यनाथाचे दर्शन घेतले. मंत्री धनंजय मुंडे यांनी आपल्या जगमित्र कार्यालयात जनता दरबार भरविला आहे, जिथे ते कार्यकर्त्यांच्या गाठीभेटी घेत आहेत. दरम्यान, आज गुरुवारपासून शहरातील बाजारपेठ सुरळीत झाली आहे.
वाल्मीक कराडवर मकोका अंतर्गत कारवाई झाल्यानंतर मंगळवारी शहरात तीव्र पडसाद उमटले. परळी पोलीस ठाण्यासमोर कराड यांच्या नातेवाईकांनी आंदोलन करून चार समर्थक कार्यकर्त्यांनी आत्मदहनाचा प्रयत्न केला. बुधवारी पांगरी गावात कराड समर्थकांनी मोबाईल टॉवरवर चढून आंदोलन केले.
वाल्मीक कराडवर झालेल्या खोट्या गुन्ह्यांची मागणी मागे घेण्यासाठी दोन दिवस परळी शहर बंद होते. तसेच परळी तालुक्यातील धर्मापुरी आणि सीरसाळा येथेही बंद पकारण्यात आला होता. या पार्श्वभूमीवर मंत्री धनंजय मुंडे मुंबईहून तातडीने बुधवारी सकाळी परळीत दाखल झाले.
त्यांनी कार्यकर्त्यांना शांततेचे आवाहन केले आहे. त्यानंतर गुरुवारपासून शहरातील बाजारपेठ सुरळीत झाली आहे. मंत्री धनंजय मुंडे आपल्या जगमित्र कार्यालयात कार्यकर्त्यांच्या गाठीभेटी घेत आहेत.