बीडचे पोलीस अधीक्षक नवनीत कॉवत यांनी आज प्रसारमाध्यमांसोबत संवाद साधला. आज भाजपचे आष्टीचे आमदार सुरेश धस आणि बीडचे खासदार बजरंग सोनवणे यांनी जिल्हा पोलीस अधीक्षक नवनीत कॉवत यांची भेट घेतली. यानंतर, नवनीत कॉवत यांनी प्रसारमाध्यमांसोबत बोलताना बीडमधील शस्त्र परवाने, सोशल मीडियावर दहशत माजवण्याचे प्रकार आणि वाल्मिक कराड यांना असलेलं पोलीस संरक्षण याबाबतच्या प्रश्नांवर भाष्य केलं.
शस्त्र परवाने आणि त्यांचे अवलोकन
नवनीत कॉवत म्हणाले, “जेवढे शस्त्र परवाने आहेत, त्या सगळ्या परवान्यांचं अवलोकन सुरु आहे. ज्यांच्यावर गुन्हा दाखल झाला आहे, त्याबाबत कायद्याच्या हिशोबानं जिल्हाधिकाऱ्यांशी चर्चा झाली होती. कायद्यानुसार शस्त्र परवान्यांची गरज आहे की नाही याचं विश्लेषण सुरु आहे. ज्या लोकांना गरज नाही त्यांचे शस्त्र परवाने रद्द होणार आहेत.”
सोशल मीडियावर दहशत माजवणाऱ्यांना इशारा
नवनीत कॉवत पुढं म्हणाले, “युवकांना सांगितलं आहे की दहशत पसरवणारे फोटो, व्हिडीओ सोशल मीडियावर व्हायरल करु नये. जे व्हिडीओ व्हायरल करतील त्यांच्यावर गुन्हे दाखल होतील. आम्ही बीड पोलीसमध्ये तीन चार गुन्हे दाखल केले आहेत. त्यांचे शस्त्र परवाने रद्द करण्याबाबत प्रस्ताव पाठवलेला आहे.”
अवैध धंद्यांवर नियंत्रण
बीड पोलीस वरिष्ठांच्या मार्गदर्शनाखाली अवैध धंद्यांवर नियंत्रण ठेवण्याचं काम करतील. कायदा व सुव्यवस्था अबाधित ठेवू, कायद्याची कठोर अंमलबजावणी केली जाईल, असंही कॉवत यांनी म्हटलं.
संतोष देशमुख हत्या प्रकरण
संतोष देशमुख हत्या प्रकरणाचा तपास सीआयडीकडे आहे. बीड पोलीस त्यांना सहकार्य करत आहेत, असंही कॉवत यांनी सांगितलं. वाल्मिक कराड यांना असलेल्या पोलीस संरक्षणाबाबत विचारलं असता, याची माहिती घेऊन बोलू असं नवनीत कॉवत यांनी म्हटलं.