संतोष देशमुख यांच्या हत्येच्या निषेधार्थ बीड जिल्ह्यात कडकडीत बंद
बीड, दि. १३ (प्रतिनिधी): केज तालुक्यातील मस्साजोगचे सरपंच संतोष देशमुख यांच्या हत्येच्या निषेधार्थ शुक्रवारी बीड जिल्ह्यात कडकडीत बंद पाळण्यात आला. सकल मराठा समाजाच्या वतीने पुकारलेल्या या बंदमध्ये सर्वच समाजांनी तसेच राजकीय आणि सामाजिक संघटनांनी सहभाग नोंदविला. बीडसह इतर शहरांमध्ये सकाळी रॅली काढण्यात आली, व्यापाऱ्यांनी दुकाने बंद ठेवली आणि शाळा-महाविद्यालयेही बंद ठेवण्यात आली होती. दिवसभरात हा बंद शांततेत पाळण्यात आला.
पोलीस निरीक्षक प्रशांत महाजन यांना सक्तीच्या रजेवर पाठवले
संतोष देशमुख यांच्या हत्येप्रकरणात आरोप असलेले केजचे पोलीस निरीक्षक प्रशांत महाजन यांना सक्तीच्या रजेवर पाठवण्यात आले आहे. त्यांचा अतिरिक्त पदभार अनैतिक मानवी वाहतूक प्रतिबंधक कक्षाचे पोलीस निरीक्षक वैभव पाटील यांच्याकडे देण्यात आला आहे. महाजन यांच्यावर लवकरच निलंबनाची कारवाईही होणार आहे.
आरोपींची अटक
संतोष देशमुख यांच्या हत्येमध्ये राष्ट्रवादी अजित पवार गटाच्या केज तालुकाध्यक्ष विष्णू चाटे याच्यासह सातजणांचा सहभाग आढळला आहे. यातील तीन आरोपींना पोलिसांनी अटक केली आहे, परंतु चार आरोपी अजूनही फरार आहेत. या प्रकरणात पोलिसांच्या भूमिकेवरही संशय व्यक्त करण्यात आला होता, त्यामुळे पोलिस उपनिरीक्षक राजेश पाटील यांना निलंबित करण्यात आले होते.
जिल्हा बंद आणि मागण्या
संतोष देशमुख यांच्या हत्येच्या निषेधार्थ आणि या प्रकरणातील फरार आरोपींना अटक करण्यासाठी, प्रकरणाचा मास्टरमाईंड शोधण्यासाठी, आरोपींना कठोर शासन करण्यासाठी आणि हे प्रकरण फास्ट ट्रॅक कोर्टात चालवण्यासाठी शुक्रवारी जिल्हा बंदची हाक देण्यात आली होती.
पोलिस प्रशासनाचे आश्वासन
पोलिस अधीक्षक अविनाश बारगळ यांनी आंदोलकांना दिलेले आश्वासन पूर्ण करत पोलीस निरीक्षक प्रशांत महाजन यांना सक्तीच्या रजेवर पाठवले आहे. तसेच चोकशी पूर्ण होताच महाजन यांना निलंबित केले जाणार आहे. केजची जबाबदारी अनैतिक मानवी वाहतूक प्रतिबंधक कक्षाचे पोलीस निरीक्षक वैभव पाटील यांच्याकडे देण्यात आली आहे. वैभव पाटील यांनी सीआयडी पुणे, अकोला आदी ठिकाणी कर्तव्य बजावलेले आहे.
या आधी सुद्धा पोलीस निरीक्षक प्रशांत महाजन यांचे निलंबन
जालन्या मधील खाजगी रुग्णालयातील मारहाण प्रकरणामध्ये याआधी सुद्धा पोलिस निरीक्षक प्रशांत महाजन निलंबित आले होते. शहरातील एका खासगी रुग्णालयात येथे ता. नऊ एप्रिल रोजी एका रुग्णाच्या मृत्यूनंतर तोडफोड झाली होती. तेव्हा घटनास्थळी दाखल झालेल्या पोलिसांनी भाजप युवा मोर्चा सरचिटणीस शिवराज नारीयलवाले यांना मारहाण केली होती, या मारहाणीचा एक व्हिडिओ सोशल मिडियावर व्हायरल झाला होता. त्यानंतर पोलिस अधीक्षक विनायक देशमुख यांनी एक पोलिस अधिकारी, चार पोलिस कर्मचाऱ्यांना निलंबन केले होते.
त्यानंतर पोलिस निरीक्षक प्रशांत महाजन यांच्यावर काय कारवाई होते याकडे सर्वांचे लक्ष होते. या प्रकरणी विशेष पोलिस महानिरीक्षक यांनी पोलिस निरीक्षक प्रशांत महाजन यांच्या निलंबनाचे आदेश काढले होते, त्यामुळे कदीम जालना पोलिस ठाणे प्रभारी म्हणून पोलिस निरीक्षक संजय देशमुख यांची तर सदर बाजार पोलिस ठाणे प्रभारी अधिकारी म्हणून पोलिस निरीक्षक अनिरुद्ध नांदेडकर यांची नियुक्ती पोलिस अधीक्षक देशमुख यांनी केली आहे.