सातारा, दि. १३ (प्रतिनिधी): आरोपीस जामीन मिळवून देण्यासाठी चक्क न्यायाधीशांनीच लाच घेतल्याचा धक्कादायक प्रकार साताऱ्यात समोर आला आहे. विशेष म्हणजे लाचलुचपत प्रतिबंधक विभागाने (ACB) रंगेहात पकडल्याने हा भांडाफोड झाला. साताऱ्यातील सत्र न्यायालय परिसरात असलेल्या एका हॉटेलमध्ये न्यायाधीश महोदयांसह आणखी तिघांना ACB अधिकाऱ्यांनी ताब्यात घेतलं. या प्रकरणात न्यायाधीशांसह चौघांवर गुन्हा दाखल करण्यात आला होता.
न्यायाधीशांचा जामीन अर्ज फेटाळला
सातारा जिल्हा सत्र न्यायालयाने या प्रकरणातील आरोपी न्यायाधीशांचा जामीन अर्ज आज फेटाळला. ५ लाख रुपयांच्या लाचप्रकरणी जाळ्यात अडकलेले धनंजय निकम यांच्यासह चौघांचा जामीन अर्ज सत्र न्यायालयाने फेटाळून लावला. सातारा लाचलुचपत अधिकाऱ्यांनी सापळा रचून न्यायाधीश निकम यांच्यासह चौघांना रंगेहात पकडले होते. त्यानंतर आरोपींविरुद्ध गुन्हा दाखल केला होता. एका खटल्यातील संशयित आरोपीला जामीन देण्यासाठी न्यायाधीशांनी पाच लाख रुपयांची लाच मागितली होती. तक्रारदाराच्या माहितीवरून लाचलुचपत विभागाने छापा मारत ही कारवाई केली होती.
न्यायपालिकेवर शंका
सर्वसामान्यांच्या न्याय-हक्काचे ठिकाण म्हणून न्यायालयाकडे पाहिले जाते. पोलिसांकडून अन्याय झाल्यानंतरही लोक न्यायालयात न्याय मिळेल अशी अपेक्षा ठेवतात. मात्र, न्यायाधीश महोदयच लाच घेताना रंगेहात पकडल्यामुळे न्यायपालिकेवरही शंका उपस्थित झाली आहे. न्यायालयाच्या कामकाजाला धक्का पोहोचवण्याचे काम न्या. निकम यांच्या कृत्याने केले. मात्र, त्यांच्या जामीन अर्जावर सुनावणी करताना न्यायालयाने अर्ज फेटाळला आहे.