अर्थमंत्री आज आणखी एका आर्थिक मदत पॅकेजची घोषणा करू शकतात. रोजगाराला चालना देण्यासाठी या पॅकेजमध्ये विशेष योजना असण्याची शक्यता आहे. अर्थमंत्री निर्मला सीतारामन आज दुपारी साडेबारा वाजता पत्रकार परिषदेमध्ये संबोधित करणार आहेत.
केंद्र सरकार या प्रोत्साहन पॅकेजमध्ये पीएफ सबसिडी देण्याची घोषणा करू शकते. हे अनुदान कर्मचारी आणि रोजगारनिर्मिती करणारी कंपनी दोघांसाठी 10 टक्के पीएफ स्वरूपात असू शकते. केंद्र सरकारने 31 मार्च रोजी पंतप्रधान रोजगार प्रोत्साहन योजना बंद केली होती. मात्र सरकार पुन्हा एकदा ही योजना बनवण्याचा प्लॅन आखत आहे.
केव्ही कामत कमिटीकडून 26 सेक्टर्ससाठी करण्यात आलेल्या शिफारसींनुसार ही घोषणा केली जाईल. या सेक्टर्समधील कंपन्यांसाठी आपात्कालीन क्रेडिटची घोषणा केली जाईल. या घोषणेअंतर्गत या कंपन्यांना विना गॅरंटीचे कर्ज मिळेल. दरम्यान कंपन्यांप्रमाणे हे पॅकेज असेल अशी माहिती आहे. या माहितीनुसार जास्त मोठ्या रकमेची घोषणा होईल अशी आशा कमी आहे.
नोकरदारांना दिवाळी गिफ्ट-
कामगार मंत्रालयाने हा प्रस्ताव अंतिम केला असून सरकार पुढील आर्थिक पॅकेजमध्ये या योजनेची घोषणा करू शकते. पुढील दोन वर्षांसाठी अनुदान देण्याची सरकारची योजना आहे. मात्र ही योजना सुरू होण्यास 6-7 महिने लागू शकतात.
कुणाला मिळणार फायदा?
या प्रस्तावानुसार या सबसिडी योजनेचा लाभ घेण्यासाठी कर्मचाऱ्याचा पगार 15000 रुपये प्रति महिनापेक्षा जास्त असता कामा नये. यापेक्षा जास्त पगार असणाऱ्यांना या योजनेचा लाभ मिळणार नाही. सूत्रांच्या माहितीनुसार एखाद्या विद्यमान कंपनीत 50 किंवा त्यापेक्षा कमी कर्मचारी असल्यास त्या कंपनीला किमान दोन नवीन भरती करण्यास सांगितले जाऊ शकते. जर त्यात 50 हून अधिक कर्मचारी असतील तर या अनुदानाचा लाभ घेण्यासाठी कमीतकमी पाच नवीन नोकरभरती कराव्या लागतील.
पंतप्रधान रोजगार प्रोत्साहन योजनेच्या वेबसाइटनुसार, एक नवीन कर्मचारी तोच आहे जो 1 एप्रिल 2016 आधी ईपीएफओमध्ये नोंदणीकृत कंपनीत काम करत नाही. जर या नव्या कर्मचार्‍याकडे नवे यूएएन नसेल तर ते नियोक्त्याकडून (रोजगार देणारी कंपनी) ईपीएफओ पोर्टलद्वारे प्रदान केले जाते